Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 260 Hüküm no: 370 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ebûbekir’in kendisiyle evlenip ilişkiye girdikten sonra boşadığı iddiasıyla Osman Beşe b. Hüseyin aleyhine açtığı mehir davasında iddiasını ispat edemediği Fi’l-asl vilâyet-i Anadolu’da Trabzon kazâsı ahâlîsinden olup mahrûse-i Galata’da Câmi‘-i kebîr Mahallesi’nde sâkine mu‘arrefetü’z-zât Fâtıma bt. Ebî[bekir] nâm hatun mahrûse-i mezbûrede mahfil-i kazâda yine kazâ-i merkūm ahâlîsinden olup mahrûse-i mezbûrede müsâfiren sâkin Osman Beşe b. Hüseyin muvâcehesinde mezbûr Osman Beşe târih-i i‘lâmdan iki sene mukaddem Trabzon kazâsında otuz guruş mehir tesmiyesiyle mahzar-ı şuhûdda beni tezevvüc ve vaty edip ba‘dehû tatlîk etmekle mehr-i mezkûrumu taleb ederim deyü da‘vâ ol dahi müdde‘iye-i mezbûreyi tezevvüc ve vaty etmedim deyü inkâr edip müdde‘iye-i mezbûre ber-vech-i muharrer müdde‘âsına ikāmet-i beyyine edemeyip talebiyle mezbûr Osman Beşe’ye yemîn teklîf olundukda mezbûr Osman Beşe “ben va’llâhi’l-azîm müdde‘iye-i mezbûre Fâtıma’yı tezevvüc ve vaty etmedim zevcem değildir eğer zevcem ise talâk-ı bâyin ile boş olsun” deyü yemîn bi’llâhi’l-aliyyi’l-a‘lâ etmeğin mûcebince müdde‘iye-i mezbûre ber-vech-i muharrer mehir mütâlebesiyle bilâ-beyyine mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 21 Receb sene [1]221.