Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 842 Hüküm no: 1100 Orijinal metin no: [132b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe ile Ali Beşe’nin Bostancı Hüseyin b. Hasan’ı dövdüklerine dair davada taraflara süre verildiği Hâssa bostancılarından Hüseyin b. Hasan nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de kasaba-i Gekvize’ye tâbi‘ Darıca nâm karye ahâlîsinden Mehmed Beşe b. el-Hâc Mehmed ve Ali Beşe b. Abdullah nâm kimesneler mahzarlarında üzerlerine da‘vâ ve takrîr-i kelâm edip bundan akdem karye-i mezbûrda konağımda yatar iken mezbûr Mehmed Beşe ve Ali Beşe gece ile kapı urup ben dahi taşra çıkdığımda mezbûrân Mehmed Beşe ve Ali Beşe amden taş ile ağzıma urup bir ön dişimi etine beraber kırıp darbından iki dişim dahi oynayıp amelden kalmışdır, suâl olunup ihkāk-ı hâk olunmak matlûbumdur dedikde gıbbe’s-suâl mezbûrân Mehmed Beşe ve Ali Beşe cevâblarında bundan akdem biz karye-i mezbûra gece ile gider iken mezbûr Bostancı Hüseyin yolumuza inip bizi katl murâd etmekle biz dahi nefsimizi tahlîs için taş ile müdde‘î-i mezbûrun ağzına urup bir dişini kırıp ve iki dişleri dahi darbından oynamışidi deyû def‘e mukābele ettiklerinde, gıbbe’s-suâl ve’l-inkâr mezbûr Mehmed Beşe ve Ali Beşe’den def‘-i mezbûrlarını [mübeyyine] beyyine taleb olundukda her biri ityân-ı beyyine için istimhâl etmekle mehl-i şer‘î ile imhâl olunmağın mâ hüve’l-vâki‘ bi’t-taleb ketb olundu. Fî evâili Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Beşe Çukadâr-ı Hazret-i Efendi, Mehmed Bey b. Abdullah Kethüdâ-yı muhzırân, fahrü’l-eşbâh Şaban Ağa Ser-muhzırân, İbrahim Çelebi b. Ahmed.