Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 263 Hüküm no: 377 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’da Tahtakadı Vakfı’na ait harap menzil ile altındaki dükkanın Vâlide Sultan Vakfı’nın mütevellîsi Ahmed Efendi’ye ait iki adet mülk menzil ile değiştirilmesinin talep olunduğu Nezâret-i dâ‘îlerinde olan evkāfdan Galata’ya muzâfe kasaba-i Kasımpaşa’da Tahtagazi [Tahtakadı] nâm sâhibü’l-hayrın vakfı müstegallâtından kendi ismiyle müsemmâ Mahallesi’nde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb vakıf harâb menzil ile menzil-i merkūm tahtında kâin icâresi sâlifü’l-beyân Tahtagazi [Tahtakadı] Mescid-i şerifi müezzinlerine meşrûta bir kıt‘a dükkân bundan akdem süvâr-ı felek-i rahmet ve müstağrık-ı deryâ-yı mağfiret olan cennet-mekân firdevs-âşiyân merhûme ve mağfûrun-lehâ Vâlide Sultan hazretlerinin evkāf-ı şerîfeleri kāimmakām-ı mütevellîsi Ahmed Efendi’nin bi’l-icâreteyn tasarrufunda olup lâkin menzil-i merkūm ve dükkân-ı mezkûr mâil-i türâb olup vakıfda dahi ta‘mîre kudret olmamağla mahalle-i mezbûre civârında el-Hâc Şa‘ban Mahallesi’nde ve Kova İmâm Mahallesi’nde vâki‘ kāimmakām-ı mütevelli-i mûmâ-ileyhin silk-i mülk-i sahîhinde münselik hudûd ve müştemilâtları ma‘lûm iki kıt‘a mülk menziller mesâha ve rağbet ve kıymet cihetinden menzil ve dükkân-ı mevkūfe-i mezkûreden ekser ve evfer olup menzil-i mevkūf-ı mezbûr zikrolunan el-Hâc Şa‘ban Mahallesi’nde kâin menzil-i memlûk ile ve dükkân-ı merkūm Kova İmâm Mahallesi’nde kâin menzil-i memlûk ile istibdâl olunmak cânib-i vakfa enfa‘ olduğuna binâen kāimmakām-ı müşârun-ileyhin işbu arzuhâlinde istid‘âsı üzere sâdır olan fermân-ı âlîlerine imtisâlen Galata Mahkemesi’nden mürsel kuzâtdan Kâtib Süleyman Reşid Efendi dâ‘îleri ve hâssa mi‘mârânından es-Seyyid Mustafa ve Mustafa ile menzil ve dükkân-ı mevkūfe-i mezkûre ve menzileyn-i mezkûreyn üzerlerine varıp Müslimûn-ı hâzirûn ile herbiri keşf ve mesâha olundukda fi’l-vâki‘ hâl bi’l-cümle tafsîl olunan minvâl üzere olduğu zâhir olmağın vech-i meşrûh üzere istibdâline izn-i hümâyûnu şâmil tuğralı emr-i şerîf-i âlîşân inâyet ve ihsân buyrulmak recâsıyla huzûr-ı âlîlerine i‘lâm olundu. Fî 22 Receb sene [1]221.