Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 264 Hüküm no: 378 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkāl Yorgi v. Tiryande’nin eski ortağı Andon v. Silon aleyhine açtığı alacak davasında yirmi guruşa sulh olduğu Galata’ya muzâfe İstinye nâhiyesine tâbi‘ Hümâyûnâbâd nâm-ı diğer Bebek karyesinde mütemekkin bakkāl esnâfından Yorgi v. Tiryande nâm zimmî Galata Bâb Mahkemesi’nde meclis-i şer‘de sâbıkā şerîki Andon v. Silon nâm zimmî muvâcehesinde ben mersûm Andon zimmî ile bakkāl emti‘ası bey‘ u şirâsında şerîk olup ba‘dehû fesh-i akd-i şirket-birle hesâbımızı sahîhan rü’yet eylediğimizde ba‘de külli’l-hesâb mersûm Andon zimmî zimmetinde mâl-ı şirketden doksan sekiz guruş alacak hakkım zuhûr ve meblağ-ı mezkûru bana vermemekle hâlâ taleb ederim deyü da‘vâ eyledikde ol dahi külliyyen inkâr etmekle mersûm Yorgi zimmî tasaddî eylediği da‘vâsından bâ-tavassut-ı muslihîn mersûm Andon zimmî ile an-inkâr yirmi guruş üzerine ba‘de’s-sulh ve’l-kabûl bedel-i sulh-ı mezkûrdan mâ‘adâ yetmiş sekiz guruşa müte‘allika da‘vâdan mersûm Andon zimmînin zimmetini ba‘de’l-ibrâ ve’l-kabûl mûcebince bedel-i sulh-ı mezkûr yirmi guruş müdde‘î-i mersûm Yorgi zimmîye sahîhan deyni olduğunu ikrâr u i‘tirâf ve bedel-i sulh-ı mezkûr yirmi guruşu müdde‘î-i mersûm Yorgi zimmîye edâsıyla mersûm Andon zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 18 Receb sene 1221.