Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 265 Hüküm no: 379 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Reis Kölyo v. Mina’nın tüccardan Mustafa Ağa ile ortağı Abdülvehhab Hoca aleyhine açtığı alacak davasında iddiasını ispat edemediği Sefîne reislerinden arzuhâl eden Kölyo v. Mina v. Yani zimmînin li-ebeveyn karındaşı ve tarafından husûs-ı âtîde vekîl olduğu hâssa hasekilerinden Ali Ağa b. Ahmed ve Ceyb Ali Çelebi b. Veliyüddin nâm kimesneler şehâdetleriyle mahzar-ı câhid-i âtîde ber-nehc-i şer‘î sâbit olan Nikola zimmî Galata’da mahfil-i kazâda tüccârdan Mustafa Ağa b. Süleyman ve şerîki Abdülvehhab Hoca b. Ali nâm kimesneler muvâcehelerinde müvekkilim mersûm Kölyo zimmî bundan akdem Bahr-ı siyah sevâhilinde Kalas İskelesi’nden Âsitâne’ye nakl için beher takımını yirmi bir guruş ücret-i nakliye ile doksan takım i‘tibâr olunur mezbûrânın ber-vech-i iştirâk mâlik oldukları bir kıt‘a salı müvekkilim reis-i mersûma teslîm ol dahi ba‘de’t-tesellüm râkib olduğu sefînesi verâsına merbûtan Âsitâne-i aliyye’ye nakl üzere iken Atîk Fener karyesi pîşgâhında muhâlif rüzgâr ile zikrolunan sal karaya düşüp bir mikdârı zâyi‘ ve telef oldukda mevcûd olanları şerîkân-ı mezbûrân mahâll-i merkūmda ahz ve Boğaz piyâdeleriyle Âsitâne’ye nakletmeleriyle ücret-i mezkûresi olan cem‘an bin sekiz yüz doksan guruşdan mahâll-i mezkûra gelince isâbet [eden] mikdâr ile sâl-ı mezkûra merbûtan telef ve zâyi‘ olan demir ve halatların kıymeti olan bin beş yüz guruşu şerîkân-ı mezbûrândan taleb ederim deyü bi’l-vekâle da‘vâ eyledikde onlar dahi cevâblarında zikrolunan salı ol mikdâr ücret ile müvekkil-i merkūma teslîm edip mahâll-i mezkûrda karaya düşdüğünü ikrâr mâ‘adâ demir ve halat müdde‘âsını inkârlarından başka târih-i i‘lâmdan bir ay mukaddem işbu bir kıt‘a temessük nâtık olduğu üzere kasaba-i Kasımpaşa’da sâkin olduğumuz oda derûnunda müvekkil-i mesfûr Kölyo zimmî bin sekiz yüz doksan guruş ücret mütâlebesinde bizimle yedi yüz elli guruş bedel-i makbûza sulh olup mâ‘adâ bin yüz kırk guruşa ve bi’l-cümle husûs-ı mezkûra müte‘allika âmme-i da‘vâdan bizim zimmetlerimizi ibrâ ve iskāt edip biz dahi ber-vech-i muharrer ibrâsını kabûl etmişidik deyü ba‘de’d-def‘ ve’l-inkâr dâfi‘ân-ı şerîkân-ı mezbûrân ber-vech-i meşrûh def‘-i mezkûrunu mahallinde lede’t-tezkiye adl ve makbûlü’ş-şehâde idükleri ihbâr olunan Hâfız Mehmed Emin Efendi b. Mehmed ve Tersâne-i âmire çavuşlarından Mehmed Ârif Çavuş b. Mehmed nâm kimesneler şehâdetleriyle müdde‘î-i vekîl-i mersûm muvâcehesinde ber-nehc-i şer‘î isbât etmeğin mûcebince müdde‘î-i vekîl-i mersûm Nikola zimmî da‘vâ-yı mezkûresiyle şerîkân-ı mezbûrâna bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 24 Receb sene 1221.