Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 267 Hüküm no: 383 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhanî İspiro v. Yasef’in eski ortağı Duhanî Manol v. Dimitri’den beş yüz iki guruş alacağı olduğu Arzuhâl eden Duhânî İspiro v. Yasef v. Yani nâm zimmî tarafından meblağ-ı âti’z-zikri taleb [ve] da‘vâ ve ahz u kabza ve kendiye teslîme vekîl-i müseccel-i şer‘îsi Abraham v. Şirin nâm zimmî Galata Bâb Mahkemesi’nde meclis-i şer‘de derûn-ı arzuhâlde mersûmü’l-ism şerîki Duhânî Manol v. Dimitri nâm zimmî muvâcehesinde müvekkilim mersûm İspiro zimmî mersûm Manol zimmî ile fâide-i hâsılası beynlerinde münâsafaten olmak üzere Galata’da Karaköy’de Haffâflar Sûku nâm mahalde vâki‘ bir kıt‘a duhâncı dükkânında duhân bey‘ u şirâsında bir müddet şerîk olup fesh-i akd-i şirket-birle târih-i i‘lâmdan bir ay mukaddem mahâll-i merkūmda keresteci dükkânında mahzar-ı şuhûdda hesâblarıını sahîhan rü’yet eylediklerinde müvekkilim mersûmun mesfûr Manol zimmî zimmetinde gerek re’s-i mâldan ve gerek fâide-i hâsıladan nısf hissesine isâbet eden cem‘an beş yüz iki guruş alacak hakkı zuhûr edip hattâ ol kadar guruşu müvekkil-i mesfûr el-yevm zimmetinde deyni olduğunu mahzar-ı şuhûdda tâyi‘an ve kat‘iyyen ikrâr ve işhâd dahi etmekle hâlâ meblağ-ı mezkûr beş yüz iki guruşu mersûm Manol zimmîden bi’l-vekâle taleb ederim deyü ba‘de’d-da‘vâ ve’l-inkâr müdde‘î-i vekîl-i mersûm Abraham zimmî ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan Keresteci Anaştaş v. Abraham ve Mali v. Yasef nâm zimmîler şehâdetleriyle mersûm Manol zimmî muvâcehesinde vech-i şer‘î üzere isbât etmeğin mûcebince meblağ-ı mezkûr beş yüz iki guruşu müvekkil-i mesfûr İspiro zimmî için vekîl-i müdde‘î-i mersûm Abraham zimmîye edâ ve teslîme mersûm Manol zimmîye tenbîh olunduğu mübâşirleri Abdülkerim Çavuş kulları yediyle huzûr-ı âlîlerine i‘lâm olundu. Fî 27 Receb sene 1221.