Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 268 Hüküm no: 385 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Haçador’un tasarrufunda olan yeni vakıf menzilinin bazı pencereleri Raziye bt. Ali’nin evinin mahremiyetini ihlal ettiğinden gerekli tedbirleri almaya söz verdiği Mübârek rikāb-ı müstetâb-ı hüsrevânîye takdîm olunan arzuhâl bâlâsına sâdır olan fermân-ı cihân-mutâ‘larına imtisâlen Galata Bâb Mahkemesi’nden me’zûnen mürsel kuzâtdan Kâtib Mevlânâ Süleyman Reşid Efendi dâ‘îleri ve hâssa mi‘mârı hulefâsından Ser-halîfe es-Seyyid İsmail ve Mehmed Ârif halîfeler ile Galata hâricinde Hüseyin Ağa Mahallesi’nde Semerci Odaları’nda vâki‘ zikri âtî münâza‘un-fih olan vakıf menzile varıp huzûr-ı Müslimînde akd-i meclis-i şer‘-i kavîm ettikde sâhibe-i arzuhâl mu‘arrefetü’z-zât Râziye bt. Ali nâm hatun meclis-i ma‘kūd-ı mezkûrda tarîk-i hâs aşurı bir bâb vakıf menzile mutasarrıf olan derûn-ı arzuhâlde mesfûru’l-ism Kigork v. Haçador zimmî muvâcehesinde mersûm Kigork zimmînin tasarrufunda olup bu esnâda külliyyen hedm ve mi‘mârân-ı mezbûrân mesâhalarıyla kadden sekiz buçuk zirâ‘ müceddeden binâ eylediği menzilinin fevkānî iki bâb oda ve bir sofasında kâin yedi aded pencerelerinde benim menzilimin makarr-ı nisvân olan iki bâb oda ve bi’r-i mâ’ma nezâretleri olmağla suâl olunup nezâret ve zararını def‘a tenbîh olunmak matlûbumdur deyü menzileyn-i mezkûreynin mütevelliyesi tarafından Numan Efendi hâzır olduğu hâlde ba‘de’d-da‘vâ ve’s-suâl ol dahi cevâbında benim menzil-i merkūm müşrif-i harâb olduğuna binâen hedm ve nesne ihdâs etmeksizin vaz‘-ı kadîmî ve hey’et-i asliyyesi üzere binâ etmişidim deyü beynlerinde ba‘de vukū‘ı’l-münâza‘a beynleri ıslâh olunup mezbûre Râziye Hatun’un ber-vech-i muharrer iki aded odalarına nezâretden hıfz ve vikāyesi için oda-i mezkûrelerde mevcûd dört aded pencerelerine mersûm Kigork zimmî teberru‘an li’l-vakf mâlından ma‘a çârçûbe-i sağır tâ‘bir olunur şişe cam vaz‘ına ve zikrolunan bi’r-i mâ’sını dahi nezâretden kezâlik vikāye zımnında mezbûre Râziye Hatun’un menzilinde mebnî tahta perdesinin tûlen beş buçuk ve kaden dört buçuk zirâ‘ mahallini teberru‘an li’l-vakf ta‘mîr ve termîme mersûm Kigork zimmî ta‘ahhüd eyledikde mezbûre Râziye Hatun dahi ta‘ahhüdünü kabûl ve külliyyen kat‘-ı nizâ‘ ve ref‘-i husûmet eylediklerini mezbûr dâ‘îleri mahallinde tahrîr ve meclis-i şer‘e inhâ eylediği mübâşirleri Abdullah Çavuş kulları yediyle bi’l-iltimâs [huzûr-ı âlîlerine i‘lâm olundu.] Fî 29 B sene [1]221.