Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 270 Hüküm no: 388 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin sattığı sade yağ bedelinden alacağı olduğu iddiasıyla Hacı İbrahim Çelebi aleyhine açtığı davada iddiasını ispat edemediği Mehmed Beşe b. İsmail nâm kimesne Galata’da mahfil-i kazâda el-Hâc İbrahim Çelebi b. Mustafa nâm kimesne muvâcehesinde mezbûr el-Hâc İbrahim Çelebi zimmetinde bundan akdem beher vakıyyesi yetmişer paraya olmak üzere yedimden iştirâ ve kabz eylediği beş yüz on vakıyye revgan-ı sâde semeninden cem‘an sekiz yüz doksan iki buçuk guruşun yedi yüz altmış beş guruşunu yedinden ba‘de’l-ahz bâkī zimmetinde kalan yüz yirmi yedi buçuk guruşu hâlâ taleb ederim deyü da‘vâ eyledikde ol dahi cevâbında beher kıyyesi altmışar paraya olmak üzere müdde‘î-i mezbûr yedinden ol kadar vakıyye revgan-ı sâde iştirâsını ikrâr beher vakıyyede on para ziyâde müdde‘âsını ba‘de’l-inkâr müdde‘î-i mezbûr ber-vech-i muharrer ziyâde müdde‘âsını isbâta kādir olmayıp bi’t-taleb mezbûr el-Hâc İbrahim Çelebi ba‘de’t-tahlîfü’ş-şer‘î mûcebince müdde‘î-i mezbûr Mehmed Beşe da‘vâ-yı mezkûresiyle mezbûr el-Hâc İbrahim Çelebi’ye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 28 Receb sene 1221.