Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 271 Hüküm no: 391 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağ Tüccarı Üsküdarî Ahmed Yazıcı’nın yağcı mahzenini içerisindeki gedik tabir olunan alet ve edevatıyla birlikte Sakızlı Pandeli’ye beş bin guruşa sattığı Mahrûse-i Galata’da Yağ Kapanı tüccârından Üsküdarî Ahmed Yazıcı nâm kimesne mahrûse-i mezbûrede mahfil-i kazâda Sakızlı Pandeli v. Dimitri nâm zimmî muvâcehesinde takrîr-i kelâm ve tâ‘bir ani’l-merâm edip mahrûse-i mezbûrede Makaracılar Kapısı kurbünde vâki‘ iki tarafdan Dedezâde mahzeni ve iki tarafdan cidâr-ı hısn ve tarîk-i âm ile mahdûd şehriye on iki guruş kirâ-yı kadîmeli bir kıt‘a yağcı mahzeni derûnunda mevcûde şürût ve nizâma dâhil ve Başmuhâsebe Kalemi’nde mukayyed mu‘teber gedik tâ‘bir olunur müstakillen yedimde mâlım olan bir kantar ve bir keski ve bir terâzi ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve uhûd-ı mübtile ve muvâza‘adan ârî bey‘-i bâtt-ı sahîh-i şer‘î ve safka-i vâhide ile beş bin guruşa mersûm Pandeli zimmîye bey‘ ve temlîk ve gedik-i mezkûrun uhde ve tasarrufunda olduğunu nâtık Başmuhâsebe’den yedime verilen bir kıt‘a sûreti yedine teslîm eylediğimde ol dahi iştirâ ve temellük ve tesellüm ve kabûl eyledikden sonra semeni olan meblağ-ı mezkûr beş bin guruşu mersûm Pandeli zimmî yedinden tamamen ahz u kabz eyledim fîmâ-ba‘d gedik-i mersûm Pandeli zimmînin mâl-ı müşterâsı olup benim alâkam kalmamağla bey‘-i mezkûrun tağrîr ve gabnine müte‘allika da‘vâdan herbirimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk gedik-i merkūm vech-i meşrûh üzere bâ-fermân-ı âlî mukayyed gediklerden olmağla bâyi‘-i mezbûr Ahmed Yazıcı üzerinden müşteri-i mersûm Pandeli üzerine tashîh ve kaydına şerh ve mersûm Pandeli yedine sûret iktizâ eylediği huzûr-ı adâletlerine i‘lâm olundu. Fî 7 Şa‘ban [sene 1221.]