Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 272 Hüküm no: 393 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin kiracısı olduğu çilingir dükkanını tahliye edip mutasarrıfı Ahmed Hâfız Mehmed Efendi’ye teslim etmesine karar verildiği Zikri âtî çilingir dükkânına bi’l-icâreteyn mutasarrıf olan sâhib-i arzuhâl Hâfız Mehmed Efendi b. Hüseyin nâm kimesnenin damadı ve tarafından ber-vech-i âtî vekîl olduğu Hâfız Ya‘kub Efendi b. Sadeddin ve Molla Ahmed b. Ali şehâdetleriyle sâbit olan Sadullah Efendi b. İbrahim Galata’da mahfil-i kazâda Galata’da Çilingirler sûkunda vâki‘ müvekkil-i mezbûrun mutasarrıf olduğu ma‘lûmü’l-hudûd bir kıt‘a çilingir dükkânında aded-i şühûr beyân olunmaksızın şehriye icâre-i ma‘lûme ile müstecir olan derûn-ı arzuhâlde mezkûrü’l-ism Mehmed Beşe b. Ahmed muvâcehesinde mezbûr Mehmed Beşe dükkân-ı merkūmda ber-vech-i muharrer müstecir olup müvekkil-i mezbûra dükkân-ı merkūmun lüzumu olmağla gāyet-i şehr-i i‘lâma izâfetle bi’l-vekâle fesh-i îcâr etmemle dükkân-ı merkūmu gāyet-i şehr-i mezbûrda tahliye ve müvekkile-i mezbûr için bana teslîme mezbûr Mehmed Beşe’ye tenbîh olunmak matlûbumdur deyü bi’l-vekâle da‘vâ eyledikde ol dahi cevâbında husûs-ı merkūmu ve dükkân-ı merkūm şürût-ı nizâma dâhil ve aklâmda mukayyed gediklerden olmadığını ikrâr u i‘tirâf etmeğin mûcebince dükkân-ı merkūmu gāyet-i şehirde tahliye ve müdde‘î-i vekîl-i mezbûra teslîme mezbûr Mehmed Beşe’ye tenbîh olunduğu huzûr-ı âlîlerine i‘lâm olundu. Fî 4 min-Şa‘ban sene 1221.