Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 277 Hüküm no: 403 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saatçi Lamber’in yeni yaptığı evinin iki penceresi komşusu Dumna bt. Mihal’in evinin mahremiyetini ihlal ettiğinden kapatılmasının uygun olacağı Ma‘rûz-ı dâ‘î-i Devlet-i Aliyyeleridir ki Sâdır olan fermân-ı âlîlerine imtisâlen sâhibe-i arzuhâl mu‘arrefetü’ş-şahs Dumna bt. Mihal Nasrâniye’nin yedinde olup sene-i sâbık Saferi’l-hayrı’nın yirmi dokuzuncu günü tarihiyle müverrah mahrûse-i Galata Bâb Mahkemesi’nde nâibü’ş-şer‘ bulunan eşrâf-ı kuzâtdan el-Hâc İbrahim Efendi’nin hatemiyle mahtûm bâlâsı sahh-ı mekârim-semûh ile muvaşşah bir kıt‘a i‘lâm Nasrâniye-i mersûme ile hem-civârı derûn-ı i‘lâmda ve arzuhâlde mersûmü’l-ism Sâ‘atçi Lamber zimmî meclis-i şer‘de hâzır oldukları hâlde tahkīk ve tedkīk olunarak lede’l-kırâet ve’l-mütâla‘a derûn-ı i‘lâmda tafsîl olunduğu üzere mahrûse-i mezbûreye muzâfe kasaba-i Beşiktaş’da Sinan Paşa Mahallesi’nde Köprübaşı nâm mahalde kâin mersûm Lamber zimmî icâreteyn ile mutasarrıf olduğu bir bâb vakıf menzilini bundan akdem hedm ve vaz‘-ı kadîmî ve hey’et-i asliyyesi üzere binâ etmeyip ulyâ ve vustâsında ve tarîk-i âmme itâ[le] ve ihdâs eylediği tûlen beşer zirâ‘ sekizer parmak ve arzan bir zirâ‘ üçer parmak şehnişînler Nasrâniye-i mersûmenin menzili cânibine müceddeden küşâde iki aded köşe pencerelerinden Nasrâniye-i mersûmenin makarr-ı nisvân olan odalarına nezâret ve havâlesi olduğu bâ-fermân-ı âlî ma‘rifet-i şer‘ ve hâssa mi‘mârı ma‘rifetiyle lede’l-mu‘âyene o misilli tarîk-i âmme itâle olunan şehnişînlerin on sekiz parmakdan ziyâdesi bâ-fermân-ı âlî memnû‘ olup zikrolunan şehnişînlerin on sekiz parmakdan ziyâde olan dokuz parmak mikdârı kat‘ ve pencerelerin havâle ve nezâretleri def‘ olunmak üzere iken beynleri ıslâh olunup zimmî-i mersûm ihdâs eylediği iki aded pencerelerini sedd ü bend edip vakten mine’l-evkāt küşâd etmemek üzere ta‘ahhüd ve kat‘-ı nizâ‘ eyledikleri Bâb-ı Âlî’ye i‘lâm olundukda mûcebince amel olunmak üzere fermân-ı âlî sâdır olduğu nümâyân ve ba‘dehû mersûm Lamber zimmî ber-vech-i muharrer hilâf-ı fermân-ı âlî hufyeten zikrolunan pencereleri küşâd ve mugāyir-i ta‘ahhüd hâlâta cesâretini meclis-i şer‘de ikrâr u i‘tirâf etmeğin zikrolunan iki aded pencerelerin külliyyen sedd ü bend ve bir vakitle küşâd olunmamak üzere tenfîz-i fermân-ı âlî ve icrâ-yı i‘lâm-ı mer‘î zımnında hâssa mi‘mârına ve Galata kādısına hitâben müekked fermân-ı âlîleri sudûru emr-i savâb olduğu mübâşirleri Said Çavuş kulları yediyle huzûr-ı âlîlerine i‘lâm olundu el-emr li-men lehü’l-emr. Fî 13 Ş sene [1]221.