Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 278 Hüküm no: 404 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa Bey’in sattığı at bedelinden Kalyon Çavuşu İbrahim’den iki yüz otuz guruş alacağı olduğu Vilâyet-i Anadolu’da İznikmid kazâsına tâbi‘ Şeyhler kasabasında sâkin el-Hâc Mustafa Bey b. el-Hâc Ali b. Abdullah nâm kimesne tarafından husûs-ı âtîde vekîl olduğu es-Seyyid İbrahim Ağa b. es-Seyyid Mustafa ve Mehmed b. Salih nâm kimesneler şehâdetleriyle sâbit olan Mehmed Beşe b. Halil nâm kimesne Galata Bâb Mahkemesi’nde meclis-i şer‘de kalyon çavuşlarından İbrahim Çavuş b. Halil nâm kimesne muvâcehesinde mezbûr İbrahim Çavuş müvekkilim mezbûr Mustafa Bey yedinden ve mâlından mukaddemâ iştirâ ve kabz eylediği bir at semeninden iki yüz otuz guruş alacak hakkı olmağla hâlâ meblağ-ı mezkûr iki yüz otuz guruşu mezbûr İbrahim Çavuş’dan bi’l-vekâle taleb ederim deyü ba‘de’d-da‘vâ müdde‘î-i vekîl-i mezbûr ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan es-Seyyid İbrahim Ağa b. es-Seyyid Mustafa ve Ali Bey b. el-Hâc Feyzullah nâm kimesneler şehâdetleriyle mezkûr İbrahim Çavuş muvâcehesinde vech-i şer‘î üzere isbât etmeğin mûcebince meblağ-ı mezkûr iki yüz otuz guruşu müdde‘î-i vekîl-i mezbûr Mehmed Beşe’ye edâ ve teslîme mezbûr İbrahim Çavuş’a tenbîh olunduğu bi’l-iltimâs huzûr-ı âlîlerine i‘lâm olundu el-emr li-men lehü’l-emr. Fî 13 Şa‘bân sene [1]221.