Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 281 Hüküm no: 411 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe b. Hasan’ın Haçador v. Kostik’ten ikrarı üzere otuz sekiz guruş alacağı olduğu, ziyade iddiasını ispat edemediği İsmail Beşe b. Hasan nâm kimesne Galata Bâb Mahkemesi’nde meclis-i şer‘de Haçador v. Kostik nâm zimmî muvâcehesinde mersûm Haçador zimmî zimmetinde bundan akdem yedimden ve mâlımdan iştirâ ve kabz eylediği iki kîle hınta semeninden otuz sekiz guruş ve on dokuz değirmî tülbent semeninden yirmi yedi buçuk guruş ve cihet-i karzdan elli iki buçuk guruş ki cem‘an yüz [on] sekiz guruş alacak hakkım olmağla hâlâ taleb ederim deyü da‘vâ ettikde ol dahi cevâbında hınta semeninden ancak altmış sekiz guruş zimmetinde deyni olduğunu ikrâr mâ‘adâ seksen [elli] guruş müdde‘âsını ba‘de’l-inkâr müdde‘î-i mezbûr ber-vech-i muharrer ziyâde müdde‘âsına ikāmet-i beyyine edemeyip bi’t-taleb mersûm Haçador zimmî ba‘de’t-tahlîfü’ş-şer‘î mûcebince müdde‘î-i mezbûr İsmail Beşe ziyâde da‘vâsıyla mersûm Haçador zimmîye bilâ-beyyine mu‘ârazadan ba‘de’l-men‘ mersûm Haçador zimmînin ikrârıyla lâzım gelen meblağ-ı merkūm otuz sekiz guruşun müdde‘î-i mezbûr İsmail Beşe’ye edâsıyla mersûm Haçador zimmî ilzâm olunduğu huzûr-ı âlîlerine i‘lâm olundu. Fî 12 Şa‘bân sene 1221.