Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 289 Hüküm no: 428 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin mudarabe ortaklığından Manav Mehmed Beşe’den ikrarı üzere sadece dört guruş alacağı olduğu, ziyadesini ispat edemediği İbrahim Beşe b. İsmail nâm kimesne Galata Bâb Mahkemesi’nde meclis-i şer‘de Manav Mehmed Beşe b. Süleyman muvâcehesinde fâide-i hâsılası beynimizde müsâvî olmak üzere ben bundan akdem mezbûr Mehmed Beşe’ye bi-tarîkı’l-mudârabe mâlımdan beş yüz guruş def‘ u teslîm ol dahi ba‘de’l-kabz i‘mâl edip iki yüz guruş fâide hâsıla oldukdan sonra re’s-i mâlım olan meblağ-ı merkūm beş yüz guruşun dört yüz kırk altı guruşunu bana teslîm bâkī elli dört guruş ile fâide-i hâsıladan nısf hisseme isâbet eden yüz guruş ki cem‘an yüz elli dört guruşu mezbûr Mehmed Beşe’den taleb ederim deyü da‘vâ eyledikde ol dahi cevâbında cihet-i karzdan beş yüz guruş kabz edip meblağ-ı mezkûrdan gayr-ez-teslîmât elli dört guruş zimmetinde bâkī deyni olduğunu ikrâr ber-vech-i muharrer mudârabe da‘vâsını külliyyen ba‘de’l-inkâr müdde‘î-i mezbûr ber-minvâl-i muharrer mudârabe müdde‘âsına ikāmet-i beyyine edemeyip bi’t-taleb mezbûr Mehmed Beşe ba‘de’t-tahlîfü’ş-şer‘î mûcebince müdde‘î-i mezbûr ber-vech-i muharrer fâide-i hâsıladan yüz guruş hisse mütâlebesiyle bilâ-beyyine mu‘ârazadan ba‘de’l-men‘ mezbûr Mehmed Beşe’nin ikrârıyla lâzım gelen dört guruşun müdde‘î-i mezbûra edâsıyla mezbûr Mehmed Beşe ilzâm olunduğu bi’l-iltimâs [huzûr-ı âlîlerine i‘lâm olundu.] Fî 18 Ş sene [1]221.