Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 290 Hüküm no: 430 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lüleci Halil Beşe’nin, vekili sıfatıyla tahsil ettiği alacağını kendisine teslim etmesi talebiyle Ahmed Beşe aleyhine açtığı davada iddiasını ispat edemediği Lüleci Halil Beşe b. İbrahim nâm kimesne Galata Bâb Mahkemesi’nde meclis-i şer‘de Ahmed Beşe b. Ahmed nâm kimesne muvâcehesinde benim gāib ani’l-meclis İzmirli Ahmed Beşe zimmetinde lüle semeninden alacak hakkım olan üç yüz guruşu ahz u kabz ve bana teslime mezbûr Ahmed Beşe’yi tarafımdan vekîl nasb ü ta‘yîn etmişidim ol dahi ba‘de kabûli’l-vekâle meblağ-ı merkūm üç yüz guruşun ancak yetmiş guruşunu mezbûr İzmirli Ahmed Beşe’den bi’l-vekâle ahz u kabz edip bana vermeyip yedinde kalmağla hâlâ taleb ederim deyü ba‘de’d-da‘vâ ol dahi cevâbında husûs-ı mezkûru külliyyen inkâr-birle müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mezbûr Ahmed Beşe ba‘de’t-tahlîfü’ş-şer‘î mûcebince müdde‘î-i mezbûr Halil Beşe da‘vâ-yı mezkûresiyle mezbûr Ahmed Beşe’ye bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 26 Ş sene 1221.