Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 290 Hüküm no: 432 Orijinal metin no: [41b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Şeyh Mehmed Efendi’nin Bedreddin Bey Mescidi Vakfı’na olan borcunu ödediğini şahitlerle ispat ettiği Ashâb-ı hayrâtdan merhûm Bedreddin Bey Mescid-i şerifi Vakfı’nın hâlâ mütevellîsi İsmail Ağa b. Hüseyin nâm kimesne Galata Bâb Mahkemesi’nde meclis-i şer‘de es-Seyyid eş-Şeyh Mehmed Efendi b. es-Seyyid el-Hâc Halil nâm kimesne muvâcehesinde mezbûr es-Seyyid eş-Şeyh Mehmed Efendi mütevellî-i sâbık-ı merhûm es-Seyyid Mehmed Emin Efendi’nin idânesiyle vakf-ı mezbûr mâlından iktirâz ve kabz eylediği altmış guruş mezbûr es-Seyyid eş-Şeyh Mehmed Efendi’nin zimmetinde kalmağla vakf-ı mezbûr için taleb ederim deyü da‘vâ ettikde ol dahi cevâbında ikrâr lâkin ben meblağ-ı mezkûr[u] mütevellî-i sâbık-ı mezbûra hayâtında tamamen edâ ve teslîm etmişidim deyü eylediği def‘ini şehâdetleriyle makbûle olan Hasan Beşe b. Mehmed [ve] Mehmed b. Abdullah nâm kimesneler şehâdetleriyle mütevellî-i lâhık-ı mezbûr İsmail Ağa muvâcehesinde vech-i şer‘î üzere isbât etmekle mûcebince müdde‘î-i mütevellî-i lâhık-ı mezbûr İsmail Ağa da‘vâ-yı mezkûresiyle bî-vech mu‘ârazadan men‘ olunduğu bi’[l]-iltimâs [huzûr-ı âlîlerine i‘lâm olundu.] Fî 27 Şa‘bân sene 1221.