Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 291 Hüküm no: 434 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in mehir, nafaka ve barınma bedeli olarak boşandığı kocası Hüseyin Beşe’den otuz yedi guruş alacağı olduğu Galata’da Yolcuzâde Mahallesi’nde sâkine olup zâtı ta‘rîf-i şer‘î ile mu‘arrefe olan Fâtıma bt. Mehmed nâm hatun Galata Bâb Mahkemesi’nde meclis-i şer‘de zevc-i mutallıkı Hüseyin Beşe b. Ömer nâm kimesne muvâcehesinde mezbûr Hüseyin Beşe zevc-i dâhilim iken mukaddemâ iki def‘a ve târih-i i‘lâm günü bir def‘a ki cem‘an üç def‘a beni tatlîk etmekle üç def‘ada zimmetinde mütekarrir ve ma‘kūdun-aleyh olan yirmi yedi guruş mehr-i müeccelim ile nafaka-i iddet-i ma‘lûmem ve meûnet-i süknâmı mezbûr Hüseyin Beşe’den taleb ederim deyü da‘vâ ettikde ol dahi cevâbında müdde‘iye-i mezbûre Fâtıma Hatun yirmi yedi guruş mehr-i müeccel tesmiyesiyle zevce-i medhûlün-bihâsı olduğunu ve târih-i i‘lâm günü bir def‘a tatlîkini ikrâr mâ‘adâyı ba‘de’l-inkâr müdde‘iye-i mezbûre Fâtıma Hatun ber-vech-i muharrer müdde‘âsını lede’t-tezkiye makbûlü’ş-şehâde idükleri ihbâr olunan Hâfız Ahmed Efendi b. Mustafa nâm kimesne ile diğer Fâtıma bt. Ahmed ve İsmihan bt. Osman nâm hatunlar şehâdetleriyle mezbûr Hüseyin Beşe muvâcehesinde vech-i şer‘î üzere isbât etmeğin mezbûre Fâtıma Hatun mezbûr Hüseyin Beşe’den beynûnet-i mug[ā]laza? ile mübâyene olup mezbûr Hüseyin Beşe’nin ikrârı mûcebince lâzım gelen meblağ-ı mezkûr yirmi yedi guruş mehr-i müeccel ve nafaka-i iddet-i ma‘lûme ve meûnet-i süknâm için bi’t-terâzî ta‘yîn olunan on guruş ki cem‘an otuz yedi guruşu müdde‘iye-i mezbûre Fâtıma Hatun’a edâsıyla mezbûr Hüseyin Beşe ilzâm olunduğu bi’[l]-iltimâs [huzûr-ı âlîlerine i‘lâm olundu.] Fî 26 Ş sene 1221.