Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 294 Hüküm no: 441 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin bal ve sade yağ ticaretinden kendisine iki yüz elli guruş vermeyi vadettiği iddiasıyla Mehmed b. Ali’nin açtığı alacak davasının meşru olmadığı Mehmed b. Ali nâm kimesne Galata Bâb Mahkemesi’nde meclis-i şer‘de tüccârdan Ahmed Beşe b. Ömer nâm kimesne muvâcehesinde ben beher şehr on ikişer guruş ücret tesmiyesiyle mezbûr Ahmed Beşe’ye dört ay eylediğim hizmetimin ücret-i müsemmâsı olan cem‘an kırk sekiz guruşu mezbûr Ahmed Beşe yedinden tamamen ahz etmişidim lâkin mezbûr Ahmed Beşe’nin hizmetinde olduğum müddetde mezbûr Ahmed Beşe mâlından âhara bey‘ eylediği asel ve revgan-ı sâdenin fâide-i hâsılasından iki yüz elli guruşu bana vermeğe va‘ad etmekle mücerred va‘ad-i mezkûruna binâen meblağ-ı mezkûr iki yüz elli guruşu mezbûr Ahmed Beşe’den talebe ederim deyü tasaddî eylediği da‘vâsı takrîr-i meşrûhu üzere meşrû‘a olmayıp mezbûr Ahmed Beşe’ye bî-vech mu‘ârazadan men‘ olunduğu bi’[l]-iltimâs [huzûr-ı âlîlerine i‘lâm olundu.] Fî 6 Ramazan sene 1221.