Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 296 Hüküm no: 446 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiremitçi Anaştaş’ın kiremit bedelinden alacağı olduğu iddiasıyla Keresteci Seyyid Mehmed aleyhine açtığı davada elli guruşa sulh olduğu Kiremidci esnâfından Anaştaş v. Aleksi nâm zimmî Galata Bâb Mahkemesi’nde meclis-i şer‘de keresteci esnâfından es-Seyyid Mehmed b. Hasan nâm kimesne muvâcehesinde mezbûr es-Seyyid Mehmed zimmetinde bundan akdem yedimden ve mâlımdan aded ve fiyatı beynimizde ma‘lûm kiremid semeninden iki yüz yetmiş dokuz guruşdan bâkī yüz altmış iki guruş alacak hakkım olmağla hâlâ taleb ederim deyü mersûm Anaştaş zimmî tasaddî eylediği da‘vâsından bâ-tavassut-ı muslihîn mezbûr es-Seyyid Mehmed ile elli guruş üzerine ba‘de’s-sulh ve’l-kabûl mâ‘adâ yüz on iki guruşa müte‘allika da‘vâdan mezbûr es-Seyyid Mehmed’in zimmetini ba‘de’l-ibrâ ve’l-kabûl ibrâdan müstesnâ bedel-i sulh-ı mezkûr elli guruşu müdde‘î-i mersûm Anastaş zimmîye zimmetinde sahîhan deyni olduğunu ba‘de’l-ikrâr mûcebince meblağ-ı mezkûr elli guruşu müdde‘î-i mersûm Anaştaş zimmîye edâsıyla mezbûr es-Seyyid Mehmed ilzâm olunduğu bi’[l]-iltimâs huzûr-ı âlîlerine i‘lâm olundu. Fî 13 Ramazan sene 1221.