Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 297 Hüküm no: 447 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lağımcı Osman Ağa’nın alacağına kefaletlerinden dolayı çavuşlar Mehmed Selim ve Humbaracı İbrahim Ağa’dan iki yüz elli guruş alacağı olduğu Lağımcı zü‘amâlarından Osman Ağa b. Mehmed nâm kimesne Galata Bâb Mahkemesi’nde meclis-i şer‘de sefîne-i sultânîye çavuşlarından Mehmed Selim b. Ömer ve Humbaracı İbrahim Ağa b. Hasan nâm kimesneler muvâcehesinde gāib ani’l-beled Birinci Ali Ağa b. Abdullah nâm kimesne zimmetinde bâ-temessük cihet-i karzdan üç yüz guruşdan bâkī iki yüz elli guruş alacak hakkım olup mezbûrân Mehmed Selim Çavuş ve Humbaracı İbrahim Ağa meblağ-ı bâkī-i mezkûr iki yüz elli guruşun edâsına bi’l-emr ve’l-kabûl müte‘âkiben kefîl bi’l-mâl ve zâmin olmalarıyla hâlâ meblağ-ı bâkī-i mezkûr iki yüz elli guruşu bi-hükmi’l-kefâle mezbûrândan taleb ederim deyü da‘vâ eyledikde onlar dahi ber-vech-i muharrer ikrâr u i‘tirâf etmeğin mûcebince meblağ-ı bâkī-i mezkûr iki yüz elli guruşu müdde‘î-i mezbûr Osman Ağa’ya edâsıyla mezbûrân Mehmed Çavuş ve Humbaracı İbrahim Ağa ilzâm olunduğu huzûr-ı âlîlerine i‘lâm olundu. Fî 13 N sene 1221.