Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 298 Hüküm no: 450 Orijinal metin no: [43a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanako v. Yorgi’nin menzil ve bağını fuzuli zapt ettiği iddiasıyla Nikola v. Yani aleyhine açtığı men‘ davasında sulh olduğu Derûn-ı arzuhâlde mersûmü’l-ism Yanako v. Yorgi zimmî bi’t-terâzî mahrûse-i Galata’da mahfil-i kazâda arzuhâl edenlerden Nikola v. Yani zimmî muvâcehesinde vilâyet-i Rumeli’de Şarköyü kazâsına tâbi‘ Uçmakdere karyesinde vâki‘ lede’l-ahâlî ma‘lûmü’l-hudûd ve’l-müştemilât mâlik olduğum bir bâb menzilimi ve karye-i mezbûre bağları hilâlinde kâin kezâlik ma‘lûmü’l-hudûd bi’l-cümle kürûmu mülküm olan bir kıt‘a bâğımı mersûm Nikola zimmî fuzûlî zabt etmekle kasr-ı yedine tenbîh olunmak matlûbumdur deyü tasaddî eylediğim da‘vâmdan bâ-vesâtet-i muslihîn mersûm Nikola zimmî ile beş guruş bedel-i makbûza sulh olduğumda ol dahi sulh-ı merkūmu ba‘de’l-kabûl zikrolunan menzile ve bağa ve târih-i i‘lâma gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan mersûm Nikola zimmî ile li-ebeveyn er karındaşları gāib ani’l-meclis Yorgi ve Vasil zimmîlerden herbirinin zimmetlerini kabûlü hâvî ibrâ edip bu vechile kat‘-ı münâza‘a eyledik deyü ikrâr ve tasdîkleri tescîl ve mübâşirleri Hâfız Çavuş kulları yediyle huzûr-ı âlîlerine i‘lâm olundu. Fî 4 L sene [1]221.