Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 298 Hüküm no: 451 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Yorgi’nin tasarrufunda olan vakıf kahvehanenin kiracısı ölmesi üzerine merhûmun karısı Şerife Rukiye Hatun tarafından tahliye edilip kendisine teslimine karar verildiği Arzuhâl eden tüccârdan Yorgi v. Praşkova zimmî zikri câ’î husûsu bi’l-ma‘iyye rü’yete memûr olan Haremeyn-i Muhteremeyn Müfettişi müderrisîn-i kirâmdan Mehmed Atâullah Efendi tarafından mürsel Kâtib Ya‘kub Efendi ile mahrûse-i Galata’da mahfil-i kazâda akdolunan meclis-i şer‘-i münîrde derûn-ı arzuhâlde ismi mezkûre ve zâtı vech-i şer‘î üzere mu‘arrefe Şerife Rukiye bt. İbrahim nâm hatun muvâcehesinde Dârü’s-sa‘âdeti’ş-şerîfe ağası hazretlerinin nezâretlerinde âsûde evkāfdan Ayasofya-i kebîr Vakfı mütevellîsi Mustafa Efendi tarafından Câbî-i vakf el-Hâc İbrahim Efendi ile Teberdâr Ârif Ağa hâzır oldukları hâlde vakf-ı mezbûr musakkafâtından bâ-temessük-ı mütevellî bi’l-icâreteyn tasarrufumda olup mahrûse-i mezbûre hısnı ebvâbından Eğrikapı hâricinde vâki‘ ma‘lûmü’l-hudûd ve’l-müştemilât bir bâb kahvehâneyi bundan akdem aded-i şühûr beyân olunmaksızın şehriye ikişer guruş icâre tesmiyesiyle mezbûre Şerife Rukiye Hatun’un zevci Bekci Ali Beşe’ye îcâr ve teslîm ol dahi ber-vech-i muharrer istîcâr ve tesellüm ve kabûl edip ber-vech-i mübeyyen kahvehâne-i merkūmede mezbûr Bekci Ali Beşe şehriye ikişer guruş icâre ile müsteciren sâkin iken vefât edip icâre-i mezkûre münfesih oldukdan sonra mezbûre Şerife Rukiye Hatun zevcesi olmak takrîbiyle kahvehâne-i merkūmeyi fuzûlen zabt edip benim tasarrufuma mâni‘ olmağla kasr-ı yedine tenbîh ve müdâhaleden men‘ olunmak matlûbumdur deyü câbî-i hâzır-ı mezbûrun tasdîkiyle da‘vâ eyledikde ol dahi cevâbında ber-vech-i meşrûh ikrâr u i‘tirâf edip lâkin kahvehâne mezkûre zevcim müteveffâ-i mezbûrun müddet-i vâfire icâresinde olmağla ben dahi zevcesi olduğum ecilden kemâ-fi’s-sâbık icâre-i kadîmesiyle sâkin olup da‘vâsı meşrû‘a ve mu‘tebere olmamağla kelâmına iltifât olunmayıp alâ-mûcibi ikrârihâ kahvehâne-i merkūmeyi tahliye ve mutasarrıfı müdde‘î-i mersûm Yorgi zimmîye teslîme mezbûre Şerife Rukiye Hatun’a tenbîh olunduğu tescîl ve bi’[l]-iltimâs huzûr-ı âlîlerine i‘lâm olundu. Fî 13 N sene 1221.