Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 300 Hüküm no: 453 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin karzdan ve emanet eşyadan iki yüz sekiz guruş alacağı olduğu iddiasıyla Reis Dimo aleyhine açtığı davada otuz guruşa sulh olduğu Ali Beşe b. Ahmed nâm kimesne Galata Bâb Mahkemesi’nde meclis-i şer‘-i şerîfde sefîne reislerinden Dimo v. Yorgo nâm zimmî muvâcehesinde mersûm Dimo zimmî zimmetinde cihet-i karzdan dört yüz guruşdan bâkī yüz elli guruş ve mâlımdan bundan akdem isti‘âre ve kabz ve te‘addî ve nakīsayla istihlâk eylediği iki aded tüfengin kıymetleri olan elli sekiz guruş ki cem‘an iki yüz sekiz guruşu mersûm Dimo zimmîden taleb ederim deyü tasaddî eylediğim da‘vâmdan bâ-vesâtet-i muslihîn mersûm Dimo zimmî ile otuz guruşa ba‘de’s-sulh ve’l-kabûl bedel-i sulh-ı merkūmdan mâ‘adâ seksen iki guruşa müte‘allika da‘vâdan mersûm Dimo zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm otuz guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm otuz guruşun müdde‘î-i mezbûr Ali Beşe’ye edâsıyla mersûm Dimo zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 4 L sene 1221.