Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 301 Hüküm no: 456 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varilci Todori v. Vasil’in karzdan Tanaş v. Kostantin ve Tarandafil v. İstavri’den bin dört yüz sekiz guruş alacağı olduğu Galata hısnı ebvâbından Balıkpazarı Kapısı hâricinde mütemekkin Varilci Todori v. Vasil nâm zimmî Galata Bâb Mahkemesi’nde meclis-i şer‘de Tanaş v. Kostantin ve Tarandafil v. İstavri nâm zimmîler muvâcehelerinde mersûmân Tanaş ve Tarandafil zimmîler zimmetlerinde bundan akdem herbiri âharın zimmetine lâzım gelen meblağa kefîl ve zâmin olmak üzere yedimden ve mâlımdan iktirâz ve kabz eyledikleri bin dört yüz sekiz guruşu bana edâ etmemeleriyle hâlâ meblağ-ı mezkûr bin dört yüz sekiz guruş zimmîyân-ı mersûmândan taleb ederim deyü da‘vâ eyledikde onlar dahi cevâblarında ber-vech-i muharrer herbiri bi-tav‘ihâ ikrâr u i‘tirâf etmeleriyle mûcebince meblağ-ı mezkûr bin dört yüz sekiz guruşu müdde‘î-i mersûm Todori zimmîye edâsıyla mersûmân Tanaş ve Tarandafil zimmîler ilzâm olundukları bi’[l]-iltimâs huzûr-ı âlîlerine i‘lâm olundu. Fî 7 L sene 1221.