Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 302 Hüküm no: 458 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bereketzâde Mahallesi ahalisinin talebi üzerine Şerife Zeliha Hatun’a tasarrufundaki evi Müslüman birisine kiraya vermesinin tembih olunduğu Mahrûse-i Galata’da Bereketzâde Mahallesi imâmı es-Seyyid Ali Efendi ve ahâlîsinden Cizyedâr es-Seyyid Mustafa Çelebi ve Ali Ağa [ve] Tatar Mehmed Salih Ağa ve el-Hâc Hüseyin Ağa ve es-Seyyid Mustafa Çelebi ve tüccârdan Mehmed Ağa ve Berber Mehmed Beşe ve es-Seyyid Osman Çelebi ve sâir mazbûtü’l-esâmî kimesneler mahrûse-i mezbûrede mahfil-i kazâda mahalle-i mezbûrede sâkine ve zâtı ta‘rîf-i şer‘î ile mu‘arrefe Şerife Zeliha bt. Mehmed nâm hatun muvâcehesinde mahalle-i mezbûrede kâin mezbûre Şerife Zeliha Hatun’un tasarrufunda olan bir bâb menzilde kadîmden Müslim iskân olunup derûnunda evkāt-ı hamsede salât-ı mefrûza edâ ve Furkān-ı kerîm tilâvet olunagelmişiken bu esnâda mezbûre Şerife Zeliha Hatun bu makūle nûr-ı tevhîd-i hazret-i Rabbi’l-mecîd ile müzeyyen olan menzili kefereye îcâr ve derûnda kefere iskân dâ‘iyesinde olmağla menzil-i mezkûr câmi‘-i şerîfe karib olduğu ecilden taklîl-i cemâ‘ate dahi bâ‘is ve âhara dahi sirâyet edeceği zâhir olmağın icâre-i misliyyesiyle kemâ-fi’s-sâbık bir Müslim kimesneye îcâr edip kefereye îcâr etmemek üzere mezbûre Şerife Zeliha Hatun’a tenbîh olunmak matlûbumuzdur deyü da‘vâ eylediklerinde mezbûre Şerife Zeliha Hatun dahi cevâbında husûs-ı mezkûru bi-tamâmihâ ikrâr u i‘tirâf etmeğin mûcebince menzil-i mezkûrda icâre-i misliyyesiyle kadîmi üzere Müslim iskân edip ba‘de’l-yevm kefereye îcâr etmemek üzere mezbûre Şerife Zeliha Hatun’a tenbîh olunduğu bi’[l]-iltimâs [huzûr-ı âlîlerine i‘lâm olundu.] Fî 5 L sene 1221.