Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 303 Hüküm no: 461 Orijinal metin no: [44a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çavuş’un alacağına kefaletlerinden dolayı Rika, Kostantin ve Dimitri kardeşler aleyhine açtığı alacak davasından vazgeçtiği Derûn-ı arzuhâlde mezkûrü’l-ism Dîvânhâne-i âmire çavuşlarından Abdullah Çavuş b. Mehmed nâm kimesne arzuhâl edenler Rika v. Dimitri ve karındaşı Kostantin v. Yani ve Petro veled-i el-mersûm Dimitri nâm karındaş zimmîler ile bi’t-terâzî Galata Bâb Mahkemesi’nde meclis-i şer‘de zimmîyyûn-ı mersûmûn âhar karındaşları gāib ani’l-meclis Yorgi v. Yani nâm zimmî zimmetinde işbu bir kıt‘a deyn temessüğü mantûkunca cihet-i karzdan alacak hakkım olan altı yüz guruşa bi’l-emr ve’l-kabûl kefîl ve zâmin olmalarıyla meblağ-ı mezkûr altı yüz guruşu zimmîyûn-ı mersûmûndan bi-hükmi’l-kefâle taleb ederim deyü tasaddî eylediğim kefâlet da‘vâsından meccânen fâriğ olup zimmîyyûn-ı mersûmûnu kefâletimizden ihrâc-birle meblağ-ı mezkûra mûcib-i kefâlete müte‘allika da‘vâdan kefîl-i zimmîyyûn-ı mersûmûnun ancak zimmetlerini ibrâ ve iskāt eyleyip onlar dahi ibrâ-i mezkûrumu kabûl eylediler deyü ikrâr ve tasdîkleri tescîl ve mübâşirleri es-Seyyid Osman Çavuş kulları yediyle huzûr-ı âlîlerine i‘lâm olundu. Fî 11 L sene 1221.