Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 304 Hüküm no: 462 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Halil b. Ahmed’in Kıbrıslı İsrail v. İsak’dan satın aldığı peynirin ayıplı çıkması üzerine sahibine iâdesine ve ödediği paranın de kendisine teslimine karar verildiği Yağcı esnâfından Halil b. Ahmed Galata’da mahfil-i kazâda Kıbrısî İsrail v. İsak Yahûdi muvâcehesinde tercümânı tarafından Yasakçı İsmail hâzır olduğu hâlde mesfûr İsrail Yahûdi târih-i i‘lâmdan yirmi gün mukaddem beher vakıyyesi yirmi altışar paraya olmak üzere mâlından yedi yüz kırk beş buçuk vakıyye kaşar peynirini bana bey‘ ve teslîm ben dahi ber-vech-i muharrer iştirâ ve tesellüm ve kabz eylediğimden sonra semeni olan cem‘an dört yüz seksen bir guruş zimmetimde iken Yahûdi bâyi‘-i mersûmun işbu hâzır bi’l-meclis Ali Çavuş’a cihet-i karzdan dört yüz seksen bir guruş deyni olup deyn-i merkūmu semen-i mezbûrdan edâ etmek üzere dâyin-i hâzır-ı mezbûr Ali Çavuş’u benim üzerime havâle-i mukayyede ile havâle ve her birimiz havâle-i mezkûreyi ba‘de’l-kabûl bu vechile semen-i merkūm dört yüz seksen bir guruşu bi-hükmi’l-havâle edâ eylediğimden sonra zikrolunan peynirin inde’t-tüccâr noksan-ı semen îcâb eder ta‘affün aybına muttalî‘ olmamla ve ayb-ı mezkûr şirâ tarihinden mukaddem olmağla redd-i mebî‘ ve istirdâd-ı semen murâdımdır deyü teveccüh-i husûmet bulunduğu hâlde da‘vâ eyledikde ol dahi cevâbında ber-vech-i muharrer bey‘ ve havâle [ve] istîfâ-yı semen eylediğini ikrâr ve hâzır-ı mezbûr dahi tasdîk eyledikden sonra gıbbe’t-tahlîfü’ş-şer‘î mûcebince zikrolunan ol mikdâr peyniri geri ahz-birle semen-i merkūm dört yüz seksen bir guruş müdde‘î-i mezbûr Halil Beşe’ye redd ü teslîme mesfûr İsrail Yahûdi’ye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 7 Şevvâl sene [1]221.