Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 848 Hüküm no: 1109 Orijinal metin no: [133a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Efendi b. Mehmed’in Yani v. Yorgi’deki alacağı kaldığı Mahmiye-i İstanbul’da Akbıyık mahallesinde sâkin işbu bâ‘isü’l-kitâb Abdurrahman Efendi b. Mehmed meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Yani v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Yorgi zimmetinde cihet-i karz-ı şer‘îden iki yüz kırk esedî guruş hakkım olup meblağ-ı mezbûrun yetmiş esedî guruşunu yedinden ahz u kabz edip bâkī zimmetinde yüz yetmiş esedî guruş hakkım kalmışidi suâl olunup alıverilmek matlûbumdur dedikde, gıbbe’s-suâl mezbûr Yorgi cevâbında fi’l-hakīka müdde‘î-i mezbûra bilâ-rehin iki yüz kırk esedî guruş cihet-i karz-ı şer‘îden deynim olup mukaddemâ meblağ-ı mezbûrun yetmiş esedî guruşunu mezbûr Abdurrahman Efendi’ye def‘ ve teslîm edip bâkī zimmetimde müdde‘î-i mezbûra yüz yetmiş esedî guruş vâcibü’l-edâ ve lâzımü’l-kazâ deynim vardır deyû ikrâr ve i‘tirâf ve meblağ-ı mezbûru târih-i kitâbdan otuz gün tamâmında edâ edeyim deyû ta‘ahhüd eyledikden sonra meblağ-ı mezbûra tarafeynden emr [ve] kabûlü hâviye kefâlet-i sahîha ile [133b] Franko v. Yani ve Yani v. Dimo ve Polo v. Yani nâm zimmîlerin her biri kefîl olmağın mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Bekçi Hasan Dede b. ( ), Mustafa Bey b. ( ), Murtaza Çelebi b. ( ). Hacı Mehmed, Yusuf Ağa b. ( ), Şükrullah Bey [b.] Mustafa.