Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 305 Hüküm no: 464 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’in karzdan alacağı olduğu iddiasıyla Francalacı Dimitri aleyhine açtığı davada yetmiş iki guruşa sulh olduğu Galata hâricinde Hüseyin Ağa Mahallesi’nde sâkine ve zâtı mu‘arrefe Fâtıma bt. İbrahim nâm hatun Galata Bâb Mahkemesi’nde meclis-i şer‘de Francalacı Dimitri v. Tanaş zimmî muvâcehesinde mersûm Dimitri zimmetinde bâ-temessük cihet-i karzdan yüz guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn-i mersûm Dimitri zimmî ile yetmiş iki guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ yirmi sekiz guruşa müte‘allika da‘vâdan mersûm Dimitri zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm yetmiş iki guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârîhi bedel-i sulh-ı merkūm yetmiş iki guruşun müdde‘iye-i mezbûre Fâtıma Hatun’a edâsıyla mersûm Dimitri zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 13 L sene 1221.