Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 306 Hüküm no: 467 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcu Seyyid Hüseyin’in mudarabe ortaklığından Şileli Mustafa Reis’den yetmiş bir guruş alacağı olduğu Tuzcu es-Seyyid Hüseyin b. es-Seyyid Mustafa nâm kimesne Galata Bâb Mahkemesi’nde meclis-i şer‘de Şileli Mustafa Reis b. Mehmed nâm kimesne muvâcehesinde ben bundan akdem fâide-i hâsılası beynimizde eslâsen olmak üzere mezbûr Mustafa Reis yedine mâlımdan bi-tarîkı’l-mudârabe def‘ u teslîm eylediğim iki yüz guruş ba‘de’l-i‘mâl meblağ-ı mezkûr iki yüz guruşu mezbûr Mustafa Reis yedinden ba‘de’l-ahz fâide-i hâsıladan benim sülüs hisseme isâbet eden yetmiş bir guruşu bana vermemekle hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin fâide-i hâsıladan müdde‘î-i mezbûrun emriyle Şile kasabasında sâkin diğer Mustafa Reis’e edâ ve teslîm etmişidim deyü eylediği def‘ini isbâta kādir olmayıp tâlib-i tahlîf dahi olmamağın mûcebince meblağ-ı mezkûr yetmiş bir guruşu müdde‘î-i mezbûr es-Seyyid Hasan’a edâ ve teslîme mezbûr Mustafa Reis’e tenbîh olunduğu bi’[l]-iltimâs huzûr-ı âlîlerine i‘lâm olundu. Fî 8 L sene 1221.