Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 306 Hüküm no: 468 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Seyyid Hüseyin’in kayık kancası ile serçe parmağını yaralayan Kayıkçı Ahmed Beşe ile elli guruşa sulh olduğu Kayıkçı es-Seyyid Hüseyin b. Ömer nâm kimesne Galata’da mahfil-i kazâda Kayıkçı Ahmed Beşe b. Mehmed muvâcehesinde mezbûr es-Seyyid Ahmed Beşe târih-i i‘lâmdan on bir gün mukaddem mahmiye-i İstanbul’da Yemiş İskelesi’nde kayık kancası ile işbu sağ elimin hınsır parmağıma amden bi-gayr-ı hakkın darb u cerh edip bi’l-külliyye amel-mânde olmağla mûcib-i şer‘îsini taleb ederim deyü tasaddî eylediğim da‘vâmdan bâ-vesâtet-i muslihîn mezbûr Ahmed Beşe ile elli guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ harc-ı mezkûra ve mâ-yahdesü minhe ve bi’l-cümle husûs-ı merkūma müte‘allika âmme-i da‘vâdan mezbûr Ahmed Beşe’nin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm elli guruşu mezbûr Ahmed Beşe’nin zimmetinde kalmağla taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm elli guruşun müdde‘î-i mezbûr es-Seyyid Hüseyin’e edâsıyla mezbûr Ahmed Beşe ilzâm olunduğu bi’[l]-iltimâs huzûr-ı âlîlerine i‘lâm olundu. Fî 15 Ramazan sene 1221.