Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 848 Hüküm no: 1110 Orijinal metin no: [133b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârislerin, Ahmed Bey b. Ali’nin, el-Hâc Mehmed b. Mehmed’e emanet verdiği eşyaları aldığı Fi’l-asl medîne-i Tokat müzâfâtından Tozanlı nâhiyesine tâbi‘ İyil nâm karye ahâlîsinden olup sefere gider iken vilâyet-i Rumeli’nde İstefe kasabasında vefât eden Ahmed Bey b. Ali nâm cündînin li ebeveyn karındaşları olan Musli ve Mahmud nâm kimesneler meclis-i şer‘de bâ‘isü’l-kitâb el-Hâc Mehmed b. Mehmed nâm kimesne mahzarında her biri ikrâr ve takrîr-i kelâm edip müteveffâ-yı mezbûrun hayâtında mezbûr Hacı Mehmed’e îdâ‘ ve teslîm ettiği iki köhne çuka kavuk ve bir mor iskerlet çuka kontoş ve bir mâî Londrine çuka dolama ve bir mâî Londrine çuka kontoş ve bir Londrine neftî çuka dolama ve bir sîm bıçak ve bir sîm külünk ve bir sîm bıçak kılıfı ve bir köhne ipek alacası entari ve bir kırmızı köhne bogasi çintiyân ve bir Tire kenarı gömlek ve bir sîm tülbent ve bir Şam alacası dört arakiyye ve bir köhne Yanbolu kebesi ve iki köhne yemeni yorgan ve iki beyaz çarşaf ve bir güğüm ve bir köhne aba-i Yaniçe ve beledî yastık ve bir mâî velense ve seferi on sahan ve bir leğen ve çengel ta‘bîr olunur sîm ön kuşağı ve bir gümüşlü masad ve balık dişi saplı sîm kılıflı bir bıçak ve iki makramayı mezbûr Hacı Mehmed’in yedinden ahz u kabz edip tereke-i müteveffâ-yı mezbûra müte‘allika da‘vâdan mezbûr Hacı Mehmed’i ibrâ-i âmm-ı kātı‘ü’n-nizâ‘ ile ibrâ ve iskāt eyledik dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Bey b. Hüseyin, Suhte Ahmed Bey b. ( ), başeski Mehmed Bey, el-Hâc Mehmed b. ( ), Ali Bey Üsküdârî, Arslan b. Aydın.