Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 310 Hüküm no: 476 Orijinal metin no: [45b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Kostantin v. Yanaki’nin kereste bedelinden Sava v. Yoseb’den yirmi beş guruş alacağı olduğu, ziyade iddiasını ispat edemediği Galata’da mütemekkin Keresteci Kostantin v. Yanaki nâm zimmî Galata Bâb Mahkemesi’nde meclis-i şer‘de Sava v. Yoseb nâm zimmî muvâcehesinde mersûm Sava zimmî zimmetinde yedimden ve mâlımdan iştirâ ve kabz eylediği kereste-i mütenevvi‘a semeninden yüz yirmi guruşdan bâkī kırk beş guruş alacak hakkım olmağla hâlâ taleb ederim deyü [da‘vâ] eylediğimde ol dahi ber-vech-i muharrer ikrâr lâkin meblağ-ı bâkī-i mezkûrun yirmi guruşunu dahi kendisine edâ ve teslîm etmişidim deyü mikdâr-ı mezkûrda eylediği def‘ini isbâta kādir olmayıp bi’t-taleb Kostantin zimmîye yemîn teklîf olundukda ol dahi yemînden nükûl etmeğin mûcebince meblağ-ı bâkī-i mezkûr kırk beş guruşun yirmi guruşunu mütâbelesiyle mersûm Kostantin zimmîye bî-vech mu‘ârazadan ba‘de’l-men‘ ikrârıyla lâzım gelen yirmi beş guruşu müdde‘î-i mersûm Kostantin zimmîye edâya mersûm Sava zimmîye tenbîh olunduğu huzûr-ı âlîlerine i‘lâm olundu. Fî 15 L sene 1221.