Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 849 Hüküm no: 1111 Orijinal metin no: [133b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Osman’ın, boşandığı kocası Ali Efendi b. İbrahim’deki mehrini tahsil ettiği Mahmiye-i İstanbul’da Mi‘mâr Sinan mahallesinde sâkine Fâtıma bt. Osman nâm hâtun meclis-i şer‘-i hatîr-i lâzımü’t-tevkīrde kuzât-ı Mısriyyeden işbu bâ‘isü’l-kitâb Ali Efendi b. İbrahim mahzarında bi tav‘ihâ ikrâr ve takrîr-i kelâm edip mezbûr Ali Bey Efendi zevcim olup beni talâk-ı bâyin ile tatlîk etmeğin zimmetinde mütekarrir ve ma‘kūdun aleyh olan elli esedî guruş mehr-i müeccelimi mezbûrdan da‘vâ eylediğimde ol dahi ancak zimmetimde mehr-i müeccelin bin akçedir deyû elli guruş mehrim olduğunu inkâr etmekle beynimizde münâza‘ât-ı kesîre ve muhâsamât-ı şedîde vakı‘a olmuşidi el-hâletü hâzihî beynimize muslihûn tavassut edip meblağ-ı mezbûr da‘vâsından mersûm Ali Efendi ile beynimizde bin yedi yüz akçe üzerine sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yedi yüz akçeyi mezbûr Ali Efendi yedinden bi’t-tamâm ahz u kabz edip husûs-ı mezbûra ve zevciyyete müte‘allika cemî‘ de‘âvîden her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Efendi b. Abdülbâkī, Mehmed Çavuş b. İbrahim, Süleyman Çelebi b. Ömer, Abdi Çelebi b. Hüseyin.