Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 314 Hüküm no: 484 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Hacı Mehmed Ârif’in kiracısı olduğu mahzeni tahliye edip mutasarrıfları Berberler Kethüdası Seyyid Hacı Mustafa Ağa ve ortağı Abdüllatif Efendi’ye teslimine karar verildiği Mahrûse-i Galata ahâlîsinden olup husûs-ı âtîde kendi nefsinden asîl ve zikri câ’î mahzende müşteriki müderrisîn-i kirâmdan Abdüllatif Efendi b. Abdurrahman tarafından vekîl-i müsecceli Berberler Kethüdâsı es-Seyyid el-Hâc Mustafa Ağa b. es-Seyyid el-Hâc Ahmed mahrûse-i mezbûrede mahfil-i kazâda hâssa hasekilerinden el-Hâc Mehmed Ârif b. Ahmed muvâcehesinde mezbûr el-Hâc Mehmed Ârif Ağa mahrûse-i mezbûrede Bezzâzistân kurbünde vâki‘ müvekkilim mûmâ-ileyh ile ber-vech-i iştirâk mutasarrıf olduğumuz bir kıt‘a kârgir mahzeninde aded-i şühûr beyân olunmaksızın beher şehr yüz para icâre ile müşâhereten müstecirimiz olmağla bu esnâda mahzen-i mezkûrun bize lüzûmu olup işbu târih-i i‘lâm şehri gāyetine izâfetle fesh-i îcâr etmemizle gāyet-i şehr-i merkūmda mahzen-i mezkûru tahliye ve hâliyeten bize teslîme mezbûr el-Hâc Mehmed Ârif Ağa’ya tenbîh olunmak matlûbumuzdur deyü bi’l-asâle ve’l-vekâle da‘vâ eylediğimde mezbûr el-Hâc Mehmed Ârif Ağa dahi cevâbında ber-vech-i muharrer ikrâr u i‘tirâf etmeğin mûcebince gāyet-i şehr-i merkūmda mahzen-i mezkûru tahliye ve müdde‘î-i mezbûr es-Seyyid el-Hâc Mustafa Ağa’ya hâliyeten teslîme mezbûr el-Hâc Mehmed Ârif Ağa’ya tenbîh olunduğu bi’[l]-iltimâs huzûr-ı âlîlerine i‘lâm olundu. Fî 5 N sene 1221.