Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 315 Hüküm no: 486 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Hasan Beşe’nin mudarabe ortaklığı üzere satın alındıktan sonra zayi olan fasulye bedelinden hissesine düşeni vermesi talebiyle ortağı Memiş Beşe aleyhine açtığı davada haklı olduğunun anlaşıldığı Tüccârdan Hasan Beşe b. Ahmed Galata’da mahfil-i kazâda Memiş Beşe b. İsmail muvâcehesinde bundan akdem “Bahr-ı siyah sevâhilinde Kalas İskelesi’nde âhara bey‘ ve kabz-ı semen-i merkūmu bana îsâl eyle” deyü mâlımdan mecmû‘u yüz yetmiş beş guruş kıymetli ma‘lûmü’l-ecnâs kerestemi mezbûr Memiş Beşe yedine def‘ ve teslîm ol dahi ba‘de’t-tesellüm mahâll-i merkūmda âhara bey‘ ve kabz edip semen-i merkūmun otuz guruşunu bana def‘ u teslîm bâkī yüz kırk beş guruş yedinde kalmağla hâlâ taleb ederim deyü da‘vâ eyledikde ol dahi cevâbında müdde‘î-i merkūm zikrolunan keresteyi âhara bey‘ ve kabz-ı semen eyledikden sonra semen-i merkūmu mudârabeten i‘mâl ile her ne fâide hâsıla olursa fâidesi beynimizde münâsafaten taksîm ederiz deyü bana def‘ u teslîm ben dahi tesellüm ve kabz ve ol mikdâr semen-i makbûza âhara bey‘ ve semen-i merkūm ile iskele-i merkūmede ma‘lûmü’l-vezn fasulye iştirâ ve sefîneye vaz‘ ve tahmîl ve Âsitâne’ye nakl üzere iken esnâ-yı tarîkde fırtına zuhûr edip gark ihtimâli gālib olmağla sefîneye hiffet gelmek için zikrolunan fasulyeyi deryâya ilkā etmişidim deyü eylediği ilkā da‘vâsını mukır ve ber-vech-i muharrer mudârabe da‘vâsını münkir olmağla mezbûr Memiş Beşe ber-vech-i muharrer mudârabe müdde‘âsını şehâdetleri makbûle olan Mehmed Emin Beşe b. Ali ve Mehmed Beşe b. Mustafa şehâdetleriyle muvâcehesinde vech-i şer‘î üzere isbât etmeğin mûcebince zikrolunan ol mikdâr fasulyenin vakt-i ilkāda olan kıymeti lâzım geldiği huzûr-ı âlîlerine i‘lâm olundu. Fî 17 L sene 1221.