Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 316 Hüküm no: 487 Orijinal metin no: [46b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Anaştaş ve kız kardeşi Anaştasya’nın babalarından intikal eden arsaları üzerine yeni bir dükkân yapmalarına kiracıları Çamaşırcı Takor v. Bedros ve kardeşi Rahib Bogos’un müdahalelerinin men‘i Galata’da Sultan Bayezid Mahallesi’nde mütemekkin iken bundan akdem hâlik olan Anaştaş v. Sava zimmînin sulbî sagīr oğlu Dimitri ve sagīr kızı Anaştasya’nın anaları ve vasîleri Vasilike bt. Dimitri nâm Nasrâniye tarafından husûs-ı âtîde vekîl olduğu şahsı ârifân Nikola v. Mihal ve Sava v. Todori zimmîler şehâdetleriyle mahzar-ı câhid-i âtîde ber-nehc-i şer‘î sâbit ve sübût-ı vekâletine hükm-i şer‘î lâhık olan Yoseb v. Bağdasar zimmî mahrûse-i mezbûrede mahfil-i kazâda câmeşûycu esnâfından Takor zimmî ile li-ebeveyn karındaşı Rahib Bogos veledi Bedros muvâcehelerinde müvekkile-i mersûmenin vasîleri olduğu sagīrân-ı merkūmânın babaları hâlik-i mesfûrdan müntakil mahrûse-i mezbûrede Karaköy karşısında keresteci ittisâlinde bir kıt‘a câmeşûycu dükkânında şehriye ücret-i ma‘lûme ile aded-i şühûr beyân olmaksızın mersûm Takor zimmî müşâhereten müstecir iken dükkân-ı merkūm bu esnâda muhterik ve icâre münfesih oldukdan sonra müvekkilem vasiyy-i mersûme kendi mâlıyla evlâdları sagīrân-ı mersûmân için arsa-yı merkūme üzerine âhar dükkân binâsına şürû‘ etmekle mersûmân Takor ve Rahib Bogos bî-vech müdâhale ve mümâna‘at etmeleriyle fîmâ-ba‘d men‘ ve müdâhaleleri def‘ olunmak müvekkilem mersûmenin bi’l-vesâye matlûbudur deyü bi’l-vekâle da‘vâ eyledikde mersûmân Takor ve Rahib Bogos cevâblarında biz dükkân-ı merkūmun hâlî gediğine rağbet verip beyne’l-hiref câmeşûycu gediği i‘tibâr olunmuş olmağla zikrolunan câmeşûycu gedikleri mer‘î ve mu‘teber ve aklâmda mukayyed olduğuna binâen müvekkile-i vasiyye-i mersûme arsa-yı mezkûre üzerine kemâ-fi’l-evvel câmeşûycu [47a] dükkânı binâ ve inşâ ve ba‘de’t-tekmîl bize icâre-i kadîmesiyle îcâr eylesin deyü ibrâz eyledikleri senedlerinde câmeşûycu esnâfının vakt-i zarûretde fesh-i îcâr ile ihrâclarına ve münâsib mahalle gedik nakline ruhsat olduğundan gayrı san‘at-ı merkūme elbise-i Müslim ve muvahhidînin san‘at-ı mersûme [ile] gasl ve tathîri için ehl-i İslâm ustalarına mahsûs mastûr ve mukayyed olmağın bu sûretde mersûmân Takor zimmî ve Rahib Bogos’un vasiyy-i mesfûra bilâ-mûcib bî-vech-i şer‘î müdâhaleleri men‘ olunduğu tescîl ve huzûr-ı âlîlerine i‘lâm olundu. Fî 22 L sene 1221.