Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 317 Hüküm no: 488 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sepetçi esnafının talebi üzerine Sepetçi Mehmed Beşe ve ortağı diğer Mehmed Beşe’ye nizamlarına aykırı hareket etmemeleri için tembihte bulunulduğu İstanbul ve bilâd-ı selâsede vâki‘ sepetçi esnâfının kethüdâları İsmail Çelebi b. Hüseyin ve müsinn [ü] ihtiyâr sepetçi ustalarından Ali Usta b. Mustafa ve İbrahim Usta b. İbrahim ve Mehmed Usta b. Hasan ve es-Seyyid Mustafa b. es-Seyyid Hasan ve Hasan Odabaşı b. İbrahim ve sâir mahrûse-i Galata’da mahfil-i kazâda esnâf-ı merkūmeden Mehmed Beşe b. İbrahim ve şerîki diğer Mehmed Beşe b. Hasan muvâcehelerinde işbu yedimizde i‘tâ buyrulan emr-i âlî mantûkunca biz İstanbul ve Galata ve Eyüb ve Üsküdar ve tevâbi‘lerinde kâin yirmi yedi aded dekâkînde sepetçi esnâf ustalarından olup dekâkîn-i merkūme vâfî ve kâfi ve ziyâde dükkân ihdâsı ve gedik ilkāsıyla dükkân tenkīs ve noksanı memnû‘ olup Cebehâne-i âmire ve Tophâne ve Tersâne ve ser-mi‘mârân-ı hâssa tarafından ebniye-i mîriye için matlûb olunan mikdâr-ı kifâye sepet kethüdâmız ma‘rifetiyle beynimizde ale’s-seviyye tevzî‘ ve taksîm ve herkesin hissesine isâbet eden mikdârı matlûb olunan mahalle kethüdâ-yı mezbûr ma‘rifetiyle teslîm etmek ve eğer matlûbât-ı mîriyeden hissesine isâbet eden mikdârı teslîmde muhâlefet ederi olursa esnâfımızdan tard u teb‘îd ve dükkânı sedd ü bend olunmak bâ-emr-i âlî nizâm-i mer‘iyye iken mezbûrân Mehmed Beşe ve diğer Mehmed ber-vech-i meşrûh matlûbât-ı mîriyyeden tevzî‘ olunan sepetlerden hisselerine isâbet eden mikdârı edâ ve teslîmden imtinâ‘ eylediklerinden başka mezbûrân Mehmed Beşe ve şerîki diğer Mehmed Beşe Galata’da Kurşunlu Mahzen dâhilinde vâki‘ dört bâb sepetçi dükkânlarından birinde sâkinler iken dekâkîn-i merkūme bu esnâda muhterik oldukda kendileri sâkin oldukları dükkân arsası ile ittisâlinde kâin işbu hâzır bi’l-meclis sâhib-i arzuhâl Sepetçi İbrahim Usta b. Mustafa’nın müşâhereten sâkin olduğu sepetçi dükkânı arsasını kemâl-i hîlelerinden mutasarrıfesi Fâtıma Hatun bâ-re’y-i mütevellî mezbûr Mehmed Beşe tefevvüz edip hâzır-ı mezbûrun gediğini ilkā dâ‘iyesiyle iki kıt‘a dükkânı bir kıt‘a dükkân binâ edip derûnunda şerîki diğer Mehmed Beşe ile sâkin olmak murâd etmekle bu sûretde mezbûrân nizâmımızın ihtilâline ve umûr-ı mühimmenin tehîrine bâ‘is hâlâta ictisâr ederler ber-mantûk-ı emr-i âlî mezbûr Mehmed Beşe ve şerîki diğer Mehmed Beşe esnâfımızdan tard ve ib‘âd ve kadîmi üzere dükkân-ı merkūm iki kıt‘a dükkân olup ba‘de’t-tedîb birinde kendileri ve birinde icâre-i misliye ile hâzır-ı mezbûr iskân olunmak matlûbumdur deyü mazmûnu min-külli’l-vücûh takrîr-i meşrûhlarına mutâbık bâlâsı tuğra-yı garrâ ile mu‘anven bir kıt‘a fermân-ı âlî ibrâzıyla da‘vâ eylediklerinde mezbûrân Mehmed Beşe ve şerîki diğer Mehmed husûs-ı mezkûru ve mazmûn-ı emr-i âlîşânı mukırr u mu‘terifler olmağın bu sûretde zikrolunan sepetlerin ebniye-i mîriyyeden başka Cebehâne-i âmire ve Tophane-i ma‘mûre ve Tersâne ve sefer-i hümâyûn vukū‘u tahakkukuna binâen ser-haddât-ı mansûriyeye lüzûmu olan mevâddan olup dükkâ[n] noksanına ruhsat verilmemekle mezbûrân Mehmed Beşe ve şerîki diğer Mehmed Beşe sâkin oldukları dükkânı ifrâz ile kadîmi üzere iki kıt‘a dükkân eyleyip birinde kendileri sâkin ve birinde icâre-i misliye ile hâzır-ı mezbûr İbrahim Beşe’yi iskân edip ber-mantûk-ı fermân-ı âlî matlûbât-ı mîriyeden esnâf ve kethüdâ ma‘rifetiyle hisselerine isâbet eden sepetleri bilâ-tehîr kabza me’mûra teslîm eylemek üzere mezbûrân Mehmed Beşe ve şerîki diğer Mehmed Beşe’ye tenbîh olunup tedîbleri husûsunda bu def‘a tehîr olunduğu huzûr-ı âlîlerine i‘lâm olundu. Fî ( )