Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 318 Hüküm no: 489 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Apostol’un hamr bedelinden Şerbetçi Abraham v. Kigork’tan yüz elli guruş alacağı olduğu Yani v. Apostol zimmî Galata’da mahfil-i kazâda Şerbetçi Abraham v. Kigork zimmî muvâcehesinde mersûm Abraham zimmî bundan akdem her müdresi doksan paraya olmak üzere yedimden ve mâlımdan iştirâ ve kabz eylediği yüz on müdre hamr semeninden iki yüz altmış yedi guruş otuz paradan bâkī yüz elli guruş zimmetinde alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsını lede’t-tezkiye ve makbûlü’ş-şehâde idükleri ihbâr olunan Panayot v. Varsimi ve Dimitri v. Yorgi ve Varsimi v. Yorgi ve Kostantin v. Yani nâm dört nefer zimmîler şehâdetleriyle mersûm Abraham zimmî muvâcehesinde ber-nehc-i şer‘î isbât etmeğin mûcebince meblağ-ı bâkī-i merkūm yüz elli guruşu müdde‘î-i mersûm Yani zimmîye edâsıyla mersûm Abraham zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 20 L sene 1221.