Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 318 Hüküm no: 490 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın diğer Ayşe bt. Mustafa aleyhine açtığı ecr-i misl davasında altmış guruşa sulh olduğu Galata’da Câmi‘-i kebîr Mahallesi’nde sâkine zâtı mu‘arrefe sâhib-i arzuhâl Âişe bt. Mustafa nâm hatun bi’t-terâzî Galata’da mahfil-i kazâda arzuhâlde mezkûretü’l-ism diğer Âişe bt. Mustafa nâm hatun tarafından husûs-ı âtîde vekîl olduğu zât-ı mezbûreyi ârifân es-Seyyid Hasan Efendi b. Mustafa ve Molla Mehmed Emin b. Mehmed şehâdetleriyle sâbit olan Hâfız Mustafa Efendi b. Yahya muvâcehesinde ben bundan akdem müvekkile-i mezbûre diğer Âişe Hatun’un talebiyle ücret kavlinsiz menzilinde yedi sene mütevâliyeten eylediğim hizmetimin ecr-i mislini müvekkile-i mezbûre diğer Âişe Hatun’dan taleb ederim deyü tasaddî eylediğim da‘vâmdan bâ-tavassut-ı muslihîn müvekkile-i mezbûre diğer Âişe Hatun ile altmış guruş bedel-i makbûza ba‘de’s-sulh ve’l-kabûl ben mâ‘adâ ücretime ve ziyâde ecr-i misl mütâlebesine ve târih-i i‘lâma gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika âmme-i da‘vâdan herbirimiz âharın zimmetini ibrâ ve iskāt ve herbirimiz ber-minvâl-i muharrer âharın ibrâsını kabûl-birle kat‘-ı münâza‘a eyledik deyü ikrâr ve tasdîkleri tescîl ve bi’l-iltimâs mübâşirleri es-Seyyid İbrahim Çavuş kulları yediyle huzûr-ı âlîlerine i‘lâm olundu. Fî 21 L sene [1]221.