Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 319 Hüküm no: 491 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. İsak’ın kendisinden yirmi üç guruş riba aldığı iddiasıyla Avadik v. Ligor aleyhine açtığı davada iddiasını ispat edemediği Galata hâricinde Hüseyin Ağa Mahallesi’nde mütemekkine sâhibe-i arzuhâl Maryem bt. İsak nâm Nasrâniye’nin er karındaşı ve tarafından husûs-ı âtîde vekîl olduğumuz şahs-ı merkūmeyi bi’l-mu‘arrefeti’ş-şer‘iyye ârifân Mehmed Salih nâm kimesne ile Artin v. Hüdaverdi nâm zimmî şehâdetleriyle sâbit olan Kazar nâm zimmî Galata Bâb Mahkemesi’nde meclis-i şer‘de derûn-ı arzuhâlde mersûmü’l-ism Avadik v. Ligor nâm zimmî muvâcehesinde mersûm Avadik zimmî mukaddemâ kız karındaşım müvekkilem mersûmeye ikrâz ve teslîm ol dahi iktirâz ve kabz eylediği altmış guruşu karındaşım müvekkilem mersûmeden ba‘de’l-ahz bilâ-devr-i şer‘î ribh nâmıyla yirmi üç guruşu dahi fuzûlî bi-gayr-ı hak ahz u kabz etmekle hâlâ meblağ-ı mezkûru yirmi üç guruşu mersûm Avadik zimmîden bi’l-vekâle istirdâd ederim deyü ba‘de’d-da‘vâ ve’l-inkâr müdde‘î-i vekîl-i mersûm ber-vech-i muharrer müdde‘âsını isbâta kādir olmayıp bi’t-taleb mersûm Avadik zimmî ba‘de’t-tahlîfü’ş-şer‘î mûcebince müdde‘î-i vekîl-i mersûm Kazar zimmî da‘vâ-yı mezkûresiyle mersûm Avadik zimmîye bilâ-beyyine mu‘ârazadan men‘ olunduğu tescîl ve mübâşirleri Mehmed Çavuş kulları yediyle huzûr-ı âlîlerine i‘lâm olundu. Fî 13 L sene 1221.