Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 319 Hüküm no: 492 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Abdullah’ın bir adet şerbethane gediği hissesi ile koltuk tabir olunur şerbethanedeki gediğinin tamamını Şerbetçi Yorgi v. Mihal’a aylık beşer guruşa kiraya verip kira ücretini arttırmamaya söz verdiği Dârü’s-saltanatü’l-aliyye Kostantıniyye el-mahmiye ahâlîsinden fahrü’l-muhadderât Zeliha Hanım bt. Abdullah b. Abdurrahman taraflarından husûs-ı âtîde vekîl-i müseccel-i şer‘îleri Mustafa Efendi b. Mehmed meclis-i şer‘-i şerîf-i enverde şerbetçi esnâfından işbu hâmilü’s-sifr Yorgi v. Mihal zimmî muvâcehesinde bi’l-vekâle takrîr-i kelâm edip mahrûse-i Galata’da Kuleli demekle ma‘rûf bir bâb şerbethâne derûnunda mevcûde beyne’l-hiref gedik tâ‘bir olunur âlât-ı ma‘lûme yüz yirmi sehm i‘tibârıyla seksen sehm-i şâyi‘i ve karşısında vâki‘ koltuk tâ‘bir olunur şerbethânede mevcûd gedik tâ‘bir olunan âlât-ı ma‘lûmenin mecmû‘u müvekkilem mûmâ-ileyhânın yedinde mâlı olmağla bundan akdem müvekkilem mûmâ-ileyhâ diğer hüccet mantûkunca mâlike olduğum âlât-ı merkūmeleri şehriye beşer guruşa mersûm Yogri zimmîye îcâr ve teslîm etmişidi el-hâletü hâzihî müstecir-i mersûm Yorgi zimmî şehriye <> beşer guruş mâh be-mâh edâ ve teslîm eylediğinde müvekkilem mûmâ-ileyhâ dahi icâre-i merkūmeyi artırmak yâhud fesh-i îcâr ile rencîde dâ‘iyesine tasaddî etmemeğe ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 L sene 1221.