Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 320 Hüküm no: 493 Orijinal metin no: [47b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camcı Ali Beşe’nin kiracısı olduğu vakıf arsa üzerindeki yanan camcı dükkanını yeniden inşa edip mutasarrıfı Mustafa Ağa’dan aylık beş guruşa kiraladığı Camcı esnâfından Ali Beşe b. Mustafa nâm kimesne meclis-i şer‘-i şerîf-i enverde zikri âtî camcı dükkânını bi’l-icâreteyn mutasarrıfı işbu bâ‘isü’l-kitâb Mustafa Ağa b. el-Hâc Mahmud mahzarında ikrâr-ı tâm ve takrîr-i kelâm edip mahrûse-i Galata’da Kemankeş Karamustafapaşa Mahallesi’nde vâki‘ bir tarafdan doğramacı dükkânı ve bir tarafdan kereste mahzeni ve bir tarafdan bahçe ve taraf-ı râbi‘i tarîk-i âm ile mahdûde bir bâb camcı dükkânı mezbûr Mustafa Ağa’nın tasarrufunda ve derûnunda mevcûde camcı gediği tâ‘bir olunur bir destgâh ve iki çekiç ve iki zenbil ve iki alçı kutusu ve sâir âlât-ı lâzıme yedimde mâlım olup dükkân-ı merkūm bu esnâda muhterik ve arsa-yı sırfa kalmağla ber-vech-i meşrûh gedik tâ‘bir olunur âlât-ı mezkûre mâlım olduğuna binâen ben dükkân-ı merkūmu kendi mâlım ile teberru‘an li’l-vakf binâ ve inşâ eylediğimden sonra mutasarrıfı mezbûr Mustafa Ağa dükkân-ı mezbûru beher şehr beşer guruş kirâ ile bana îcâr ve teslîm ben dahi istîcâr ve tesellüm ve kabûl edip mezbûr Mustafa Ağa’ya mâlımdan yüz seksen guruşu teberru‘ ve teslîm ve umûruna sarfla istihlâk emr eylediğimde ol dahi ba‘de’l-kabz ve’l-istihlâk meblağ-ı müstehlek-i merkūmun istirdâdına müte‘allika da‘vâdan mezbûrun zimmetini kabûlü hâvî ibrâ ve iskāt ve beher şehr beşer guruş kirâyı bilâ-cevr edâya ta‘ahhüd-i tâm ederim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 L sene 1221.