Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 321 Hüküm no: 495 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Sani’nin aldığı bin guruşu iade edip kardeşi İstefan’a şartlı olarak devrettiği yarım vakıf menzil hissesini geri almasına karar verildiği Sâhibe-i arzuhâl mu‘arrefetü’ş-şahs Maryem bt. Sani nâm Nasrâniye Galata’da mahfil-i kazâda menzil-i âti’z-zikre vaz‘-ı yedleri mütehakkık olup husûs-ı âtîde kendi nefsinden asîl ve zevcesi Serpohi bt. Manuk v. Manuk nâm Nasrâniye tarafından ber-vech-i câ’î vekîl olduğu şahs-ı mersûmeyi bâ-mu‘arrefetü’ş-şer‘iyye ârifân Dülbendci Asvador v. Simon ve Miskçi Anton v. Kirkor nâm zimmîler şehâdetleriyle sâbit ve sübût-ı vekâletine hükm-i şer‘î lâhık olan derûn-ı arzuhâlde mersûmü’l-ism Kürkçü Karabet v. Mardros nâm zimmî muvâcehesinde Galata kādısı fazîletlü efendi dâ‘îleri nezâretlerinde olan evkāfdan merhûm Ahmed Ağa Vakfı’nın mütevellîsi Hıfzızâde kerîmesi Emine Hatun tarafından vekîl-i müseccel-i şer‘îsi Kâtib-i vakf es-Seyyid Ali Efendi ile Nasrâniye-i mersûmenin li-ebeveyn er karındaşı İstefan zimmî hâzır oldukları hâlde vakf-ı merkūm müstegallâtından Galata hâricinde Santa Marka Mahallesi’nde kâin etrâf-ı erba‘ası Papuşçu Çalıkoğlu ve Acem Evranos menzilleri ve arsa ve tarîk-i âm ile mahdûde müştemilât-ı ma‘lûmeyi hâvî bir bâb vakıf menzilin nısf hissesi beher sene otuz akçe icâre-i müeccele ve mu‘accele-i ma‘lûme ile bâ-temessük mütevellî bundan akdem benim ve tasarrufumda iken ben nısf menzil-i merkūme izn-i mütevellî ile karındaşım hâzır-ı mersûm İstefan zimmî yedinden makbûzum olan 1.000 guruş mukābelesinde meblağ-ı mezbûru her ne zamân kendiye redd ü teslîm eder isem nısf menzil-i merkūmu bana reddetmek ve eğer meblağ-ı mezbûru benim için rü’yete, olmaz ise beni ölünce[ye kadar] görüp ve gözetmek şartıyla karındaşım mersûm İstefan zimmîye ferağa karındaşım mersûm dahi ol şartla kabûl edip ba‘dehû nısf menzil-i mezkûru benim izin ve icâzetim olmaksızın zevcân-ı mersûmâna ale’l-iştirâki’s-seviyye ferağ etmekle bu sûretde ferağ-ı evvelin şart-ı fâside mukārenetle fesâdına binâen ferağ-ı sânî dahi mu‘teber olmamağın makbûzun olan 1.00[0] guruşu kendiye redd ü teslîm-birle nısf menzil-i mezkûru re’y-i mütevellîyle tefevvüz murâdımdır deyü ba‘de’d-da‘vâ ve’l-istintak ol dahi cevâbında Nasrâniye-i mersûme vech-i meşrûh üzere nısf menzile mutasarrıfe iken nısf menzil-i merkūme 1.500 guruş bedel-i makbûz mukābelesinde karındaşı mersûme ve karındaşı mersûm dahi yine 1.500 guruş mukābelesinde izn-i mütevellîyle bana ferağ ve teslîm etmişidi deyü hâzır-ı mersûmun tasdîkiyle nısf menzil-i merkūma vaz‘-ı yedlerini bi’l-asâle ve bi’l-vekâle ikrâr şart-ı mezkûru ba‘de’l-inkâr müdde‘iye-i Nasrâniye-i mersûme ber-vech-i muharrer şart-ı mezkûr müdde‘âsını lede’t-tezkiye makbûlü’ş-şehâde idükleri ihbâr olunan Sandalcı Anparson v. Anton ve Hayyât Karabet v. Kirkor zimmîler şehâdetleriyle menzil-i mezkûru tecdîd ederek bi’l-muvâcehe vech-i şer‘î üzere ba‘de’l-isbât mersûm İstefan zimmînin bedel olmak üzere kız karındaşı Nasrâniye-i mersûmeden mütâlebesi olan meblağ-ı merkūm 1.500 guruşun ancak beş yüz guruşunu Nasrâniye-i mersûme kabzını mukırre olmağla mersûm İstefan zimmî ber-vech-i muharrer müdde‘âsına şâhid olmak üzere ikāmet eylediği Hasköylü Mosi Yahûdi ve Galatalı Yoseb ve Hanparsom zimmîler mersûm İstefan zimmînin müdde‘âsına mutâbık edâ-yı şehâdet-i şer‘iyye edememeleriyle hayyiz-i kabûlde olmayıp şâhid-i âhar ikāmete ba‘de’l-havâle nısf menzil-i merkūmun hîn-i ferağda bedel-i misli Nasrâniye-i mersûmenin makbûzundan ezyed ve evfer olduğundan mâ‘adâ “ Hüve’l-fesâdü enneke mimmâ yete‘allaku bi’l-ferağ bi’l-vakār? bi’ş-şarti” nev‘inde “Zeyd zevcesi Hind ile ale’l-iştirâk icâreteyn ile mutasarrıf oldukları vakıf menzili izn-i mütevellîyle şu kadar akçe ve dâyinleri Amr’a deynleri mukābelesinde ferağ eder olduklarında Zeyd ve Hind her ne zamân zimmetlerini edâ ederler ise Amr menzili mezbûrlara reddetmek şartıyla ferağ Amr dahi ol şartla kabûl edip mezbûrların izinleriyle menzili Bekir’e ferağ eylese mezbûrlar ferağı mücîzler olmayıp ümerâ-i belde açtırıp re’y-i mütevellî ile menzili Bekir’e almağa kādir olurlar” deyü tasrîh olunmağın mûcebince Nasrâniye-i mersûmenin mertebe-i ikrârı olan meblağ-ı mezkûr 1.000 guruşu redd ü teslîm-birle nısf menzil-i merkūmu re’y-i mütevellîyle geri tefevvüze tenbîh olunduğu mübâşirleri İbrahim Çavuş yediyle huzûr-ı âlîlerine i‘lâm olundu. Fî 25 L sene 1221.