Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 323 Hüküm no: 496 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mellâhlardan Manol, Pandeli, Harmaniko ve Nikola’nın tüccar kalyonu hocalarından Ali b. Mustafa aleyhine açtıkları ziyade ecr-i misl davasında iddialarını ispat edemedikleri Mellâh tâifesinden Manol v. Ligor ve Pandeli v. Yani ve Harmaniko v. Peliç ve Nikola nâm zimmîler Galata Bâb Mahkemesi’nde meclis-i şer‘de tüccâr kalyonu hâcelerinden Ali Hoca b. Mustafa nâm kimesne muvâcehesinde biz mezbûr Ali Hoca’nın talebiyle râkib olduğu kalyon ile Bahr-ı siyah sevâhilinde vâki‘ Kalas İskelesi’nden Âsitâne’ye gelince sekiz ay mellâhlık hizmeti edip müddet-i mezkûrede eylediğimiz hizmetimizin ecr-i misli olan herbirimize yüz yirmi guruşdan Ali Hoca bize kırk iki buçuk guruş verip ziyâde yetmiş yedi buçuk guruşumuzu bize vermemekle hâlâ taleb ederim deyü da‘vâ eylediklerinde mezbûr Ali Hoca dahi cevâbında müdde‘ûn-ı mersûmûn sekiz ay kendiye eyledikleri hizmetlerini ikrâr ve müdde‘ûn-ı mersûmûnun kabzlarını mukırr u mu‘terif oldukları meblağ-ı mezkûr kırk iki buçuk guruş ecr-i misilleri mu‘âdildir deyü ziyâde ecr-i misillerini ba‘de’l-inkâr müdde‘ûn-ı mesfûrûn ber-vech-i muharrer ziyâde müdde‘âlarına ikāmet-i beyyine edememeleriyle bi’t-taleb mezbûr Ali Hoca ba‘de’t-tahlîfü’ş-şer‘î mûcebince müdde‘ûn-ı mersûmûn ziyâde da‘vâ-yı mezkûreleriyle mezbûr Ali Hoca’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-gurreti Zilka‘de sene 1221.