Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 324 Hüküm no: 498 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtakadı Mescidi Vakfı’na ait harap menzilin Ahmed Efendi’nin mülk menziliyle değiştirilmesi için izin istendiği Galata kādıları nezâretinde evkāfdan ashâb-ı hayrâtdan merhûm Tahtakadı nâm sâhibü’l-hayrın kasaba-i Kasımpaşa’da kendi ismiyle müsemmâ mahallesinde binâ eylediği mescid-i şerîfinde müezzin olanlara meşrûta olup mahalle-i mezbûrede kâin lede’l-ahâlî ve’l-cîrân ma‘lûmü’l-hudûd ve’l-müştemilât bir bâb vakıf menzil harâb olup vakıfda ta‘mîre müsâ‘ade olmamağla menzil-i merkūmun mutasarrıfı Ahmed Efendi menzil-i merkūmu bâ-hüccet-i şer‘iyye mâlik olduğu mahalle-i mezbûrede kâin ma‘lûmü’l-hudûd ve’l-müştemilât mesâha ve rağbet ve kıymet cihetlerinden menzil-i vakıfdan ekser ve evfâ olan bir bâb mülk menzili ile istibdâle [tâlib] olmağın ma‘rifet-i şer‘iyye ve hâssa mi‘mârı ma‘rifetiyle lede’l-mesâha ve’l-keşf menzil-i mevkūf-ı mezkûr menzil-i memlûk ile istibdâli cânib-i vakfa hayr ve nâfi‘ olduğu zâhir ve menzil-i memlûk-ı mezkûr vakıf olan menzil-i mezkûrdan rağbet ve kıymet ve ücret cihetlerinden ezyed ve ekser olduğu nümâyân olmağın vech-i mezkûr üzere istibdâle izn-i hümâyûnu şâmil tuğralı emr-i âlîşân ihsân buyrulmak recâsıyla huzûr-ı âlîlerine i‘lâm olundu. Fî-N sene 1221.