Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 324 Hüküm no: 499 Orijinal metin no: [48b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkāl Yani v. Tarandafil’in eski ticârî ortağı Karamanlı Yorgi v. Mihal’den on guruş alacağı olduğu Bakkāl tâifesinden Yani v. Tarandafil zimmî Galata’da mahfil-i kazâda yine tâife-i merkūmeden Karamanlı Yorgi v. Mihal zimmî muvâcehesinde ben bundan akdem mersûm Yorgi zimmî ile fâide-i hâsılasını beynimizde müsâvî olmak üzere bakkāllık ticâretinde bir müddet şerîk olup fesh-i akd-i şirket eylediğimizde şerîkim mersûm Yorgi zimmî kâbız-ı mâl olmağla benim re’s-i mâlım olan iki yüz guruş ile nısf hisseme isâbet eden fâide-i hâsıla-yı ma‘lûmeyi ve bi-tarîkı’l-emâne yedine teslîm eylediğim otuz sekiz guruşdan bâkī on guruşu bana vermeyip yedinde kalmağla hâlâ taleb ederim deyü da‘vâ eylediğimde ol dahi cevâbında müdde‘î-i mezbûrdan sermâye olmak üzere iki yüz guruş ve emâneten otuz sekiz guruşdan bâkī on guruş kabzını ikrâr lâkin meblağ-ı merkūm iki yüz guruş kendi mâlından re’s-i mâl olmak üzere vaz‘ ve halt eylediğim bin guruş ki cem‘an bin iki yüz guruş ile bakkāl emti‘ası iştirâ ve Kasımpaşa’da kâin mütemekkin olduğumuz bakkāl derûnuna vaz‘ edip dükkânı derûnunda mevcûde iken bundan mukaddemce vukū‘ bulan harîkde dükkân-ı merkūm ve emti‘a-i mezkûre külliyyen muhterik olup ben Âsitâne-i aliyye’de müsâfir bulunduğum ecilden habbe-i vâhide tahlîs olunamayıp ancak emânet olan on guruş koynumda mevcûde olduğuna binâen tahlîs olmuşdur deyücek müdde‘î- mersûm Yani zimmî şerîki mukırr-ı mersûmu takrîr-i meşrûhunda tasdîk edip lâkin mersûm Yorgi kâbız-ı mâl olmağla kendi mâlından versin deyü tasaddî eylediği da‘vâsı iltifâta şâyân olmayıp re’s-i mal-ı merkūm iki yüz guruş mütâlebesiyle mu‘ârazadan ba‘de’l-men‘ bi’l-emâne yedinde mevcûde olduğu ikrârıyla zâhir olan meblağ-ı bâkī-i mezkûr on guruşu müdde‘î-i mersûm Yani zimmîye red ü teslîme mersûm Yorgi zimmîye tenbîh olunduğu bi’[l]-iltimâs [huzûr-ı âlîlerini i‘lâm olundu.] Fî 1 L sene 1221.