Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 325 Hüküm no: 500 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. İbrahim’in havaleden Tütüncü Emrullah Çelebi’den üç yüz yetmiş dokuz guruş alacağı olduğu Sâhib-i arzuhâl Ahmed Beşe b. İbrahim nâm kimesne Galata’da mahfil-i kazâda derûn-ı arzuhâlde mezkûrü’l-ism Tütüncü Emrullah Çelebi b. Veliyüddin nâm kimesne muvâcehesinde benim gāib ani’l-meclis Attâr Mustafa Çelebi b. Abdullah nâm kimesne zimmetinde cihet-i kefâletden ma‘lûmü’l-mikdâr alacak hakkım olup gāib-i mezbûrun dahi mezbûr Emrullah Çelebi zimmetinde attâr emti‘ası semenlerinden dört yüz yetmiş sekiz guruş alacak hakkı olmağla medyûnum gāib-i mezbûr Mustafa Çelebi deyn-i mezkûru olan dört yüz yetmiş guruş ile beni medyûnu mezbûr Emrullah Çelebi üzerine üçümüz bir meclisde hâzır iken havâle-i mukayyede-i sahîha-i şer‘iyye ile havâle ve herbirimiz havâle-i mezkûreyi ba‘de’l-kabûl bu vechile mezbûr Emrullah Çelebi zimmetinde cihet-i havâleden meblağ-ı mezkûr dört yüz yetmiş sekiz guruşdan bâkī üç yüz yetmiş dokuz guruş alacak hakkım olmağla hâlâ taleb ederim deyü ba‘de’d-da‘vâ eyledikde ol dahi cevâbında husûs-ı mezkûru bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi meblağ-ı bâkī-i mezkûr üç yüz yetmiş dokuz guruşu müdde‘î-i mezbûr Ahmed Beşe’ye bi-hükmi’l-havâle edâsıyla mezbûr Emrullah Çelebi ilzâm olunduğu bi’[l]-iltimâs huzûr-ı âlîlerine i‘lâm olundu. Fî 4 Za sene 1221.