Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 328 Hüküm no: 504 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petrovine ve Aksabet’in tasarruflarındaki şerbetçi dükkanlarını yandıktan sonra yeniden yapan eski kiracıları Sabatay ve İsak Yahûdilere aylık yüz yirmi beş paraya kiraya verdikleri Mahrûse-i Galata’da Câmi‘-i cedîd Mahallesi’nde kâin birbirine muttasıl iki kıt‘a sükkerî şerbetçi dükkânının mutasarrıfeleri Petrovine bt. Manuk ve Aksabet bt. Bogos Nasrâniyeler taraflarından husûs-ı âtîde vekîl olduğu şahıslarını ârifân İsak v. Avram ve Sabatay v. Hayim Yahûdiler muvâcehelerinde mersûmân Sabatay ve Menteş [İsak] dekâkîn-i merkūmede zikri âtî icâre-i merkūme ile müşâhereten müstecirleri iken dekâkîn-i merkūme bu esnâda muhterik oldukda gedik tâ‘bir olunur âlât-ı ma‘lûme Yahûdiyân-ı mersûmânın mâlları olduğu ecilden müvekkiletân-ı mersûmetânın haberleri ve izin [ve] icâzetleri olmaksızın teberru‘an li’l-vakf kendi mâllarından dekâkîn-i merkūmeyi sâbıkı üzere binâ ve tekmîl eylediklerinden sonra bi’l-cümle masrûfâtlarına müte‘allika da‘vâdan mutasarrıfları müvekkilelerim mersûmetânın zimmetlerini her biri ibrâ ve iskāt eylediklerinde ben dahi ibrâlarını kabûl etmişidim el-hâletü hâzihî müvekkilelerim mersûmetân Petrovine ve Aksabet Nasrâniyeler mutasarrıfe oldukları dekâkîn-i merkūmeyi beher şehr icâre-i kadîmesi olan yüz yirmi beş paradan cem‘an iki yüz elli paraya târih-i i‘lâm günü Yahûdiyân-ı mersûmâna îcâr ve teslîm eylediklerinde onlar dahi ber-vech-i meşrûh istîcâr ve tesellüm ve kabûl ve icâre-i merkūmeyi mâh be-mâh bilâ-cevr edâya ta‘ahhüd eylediler deyü mukırr-ı vekîl-i mersûmu ber-vech-i muharrer takrîr-i meşrûhunda Yahûdiyân-ı müstecirân-ı mersûmân tasdîk eyledikleri tescîl ve mübâşirleri Derviş Çavuş kulları yediyle huzûr-ı âlîlerine i‘lâm olundu. Fî 6 Ra sene 1221.