Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 328 Hüküm no: 505 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sâdık Ağa’nın tuvalet duvarının Mehmed Emin’in tasarrufundaki vakıf menzilin duvarını rutubetlendirdiği mahallinde yapılan muayeneden anlaşıldığından gerekli tedbirleri almasının kendisine tembih olunduğu Sâdır olan fermân-ı âlîlerine imtisâlen savb-ı şer‘-i enverden me’zûnen mürsel kuzâtdan Kâtib Mevlânâ Süleyman Reşid Efendi dâ‘îleri hâssa mi‘mâr hulefâsından Mustafa ve Selim halîfeler ile Galata kādıları nezâretinde merhûm Sefer Kethüdâ nâm-ı diğer Fethiye Câmi‘-i şerîfi Vakfı’nın müstegallâtından vakf-ı mezbûrun Galata’ya muzâfe kasaba-i Tophane’de kendi ismiyle müvessem mahallesinde vakıf menzile varıp huzûr-ı Müslimînde akd-i meclis-i şer‘-i âlî eyledikde menzil-i merkūmun bi’l-icâreteyn intikālen mutasarrıfı Mehmed Emin b. Mehmed’in zevcesi ve tarafından husûs-ı âtîde vekâleti Topçu ( ) b. Abdullah ve Mehmed b. Ahmed şehâdetleriyle sâbit olan zâtı mu‘arrefe sâhibe-i arzuhâl Fâtıma bt. Halil meclis-i ma‘kūd-ı mezkûrda câr-ı mülâsıkı olup vakf-ı merkūmdan bir bâb menzile mutasarrıf olan derûn-ı arzuhâlde mezkûrü’l-ism Mehmed Sâdık Ağa b. Hasan muvâcehesinde mütevellî-i vakf tarafından mürsel Ömer Efendi hâzır olduğu hâlde mezbûr Mehmed Sâdık Ağa’nın menzil kenîfi benim menzilimin duvarına istitâlinden nâşî kârîzi benim duvarıma neşf ve sirâyet ol vechile zararı olmağla def‘a tenbîh olunmak murâdım deyü ba‘de’d-da‘vâ ve ikrâr ve mu‘âyene fi’l-hakīka kenîf-i merkūmun duvarı mezkûre istitâlinden nâşî kârîzinin neşf ve sirâyeti zâhir olduğunu bi-ecmâ‘ihim meclis-i şer‘a tarafeyn muvâcehesinde ba‘de’l-inhâ mi‘mârân-ı mezbûrân istintak oldukda onlar dahi cevâblarında zikrolunan kenîfin künklü mahalli derûn ve bîrûnu mükemmel ve hâlis harc ile derz olunarak cedîdinden ide ve cedîdini dahi kezâlik hâlis harc ile etrâf-ı erba‘ası umkda bir zirâ‘ derz olup âtîde neşf ve sirâyetinden halâs oluruz deyü haber vermekle mûcebince vech-i meşrûh üzere zararını def‘a mezbûr Mehmed Sâdık Ağa’ya tenbîh olunduğu Galata Bâb Mahkemesi’nde tescîl ve Emin Çavuş kulları mübâşeretleriyle huzûr-ı âlîlerine i‘lâm olundu. Fî 9 Ra sene 1221.